Соларниот парк, како што најави Заев, би ги задоволувал потребите за струја на 94 000 домаќинства, а првите количини електрична енергија ќе протечат во 2023 година
Во Штип ќе се гради соларен парк чија инвестиција ќе биде 270 милиони евра, а ќе инвестира француската компанија „Акуо енерџи“ преку Друштвото за производство на електрична енергија „Остро солар“ од Скопје, извести премиерот Зоран Заев на денешната прес-конференција на која го претстави проектот.
„Северна Македонија ќе добие соларен парк кој ќе биде еден од најголемите во Европа со капацитет на производство на електрична енергија од 360 до 400 мегавати. Станува збор за директна француска гринфилд-инвестиција, најголема во овој домен за македонската економија“
изјави Заев на денешната прес-конференција.
Соларниот парк, како што најави Заев, би ги задоволувал потребите за струја на 94 000 домаќинства, а ќе биде изграден на потегот меѓу Штип и Свети Николе, на местото каде што требаше да биде изграден карго-аеродром. Тој најави дека првите количини електрична енергија ќе протечат во 2023 година, а целосна реализација се очекува до крајот на 2024 година. Производството на електрична енергија е проценето на околу 650 гигават-часови на годишно ниво, што претставува 16 проценти од годишното производство на струја од АД ЕСМ, посочи Заев.
Францускиот амбасадор во државава, Сирил Бомгартнер, на денешната прес-конференција истакна дека инвестицијата има големо стратегиско значење бидејќи ќе придонесе да се зајакне енергетската независност на Северна Македонија, истовремено помагајќи ѝ на земјата да го изоди својот амбициозен европски пат за намалување на емисиите на јаглерод диоксид.
Според Заев, инвестицијата е директна придобивка од реформите во енергетскиот сектор, a „Акио енерџи“ со изградба на соларниот парк „Стипион“ ќе ѝ даде нов стимул на нашата економија со ангажирање домашна работна сила.
Во моментот во фаза на градба се фотонапонски електрани преку принципот на поддршка со премиум-тарифи со инсталиран капацитет од 60 мегавати, а дел од нив се пуштени и во употреба. Изградена е првата и најголема фотонапонска електрана од страна на ЕСМ со инсталиран капацитет од 10 мегавати и наредната година ќе почнат со изградба двете електрани од по 50 мегавати во Осломеј или вкупно 170 мегавати, што е за 10 пати повеќе од 17-те мегавати кои се изградени во претходните 26 години.
Во фаза на изработка, информираше Заев, се и технички студии за изградба на нови 10 мегавати фотонапонска електрана во РЕК „Осломеј“, како и на нови 160 мегавати фотонапонски електрани во РЕК „Битола“, проекти финансирани од ЕБОР и Германската развојна банка КфВ. Владата издаде и овластување за изградба на три ветерни парка со вкупен капацитет од 110 мегавати и со постојниот ветерен парк „Богданци“ бројката ќе се заокружи на 150 мегавати. На тендерот за премиуми-тарифи, кој беше објавен оваа година, втор по ред, пријавени се инвеститори со вкупен инсталиран капацитет од 207 мегавати, иако беа понудени само 80 мегавати. Заев на крајот заклучи дека ова е показателот дека работите се движат во вистинска насока.