Војници со факли и оркестарот на Бундесверот ќе ја испратат во заслужена пензија жената која 16 години го диктираше курсот на европската политика.
Денеска е историски ден за Германија и за канцеларката во заминување Ангела Меркел. Вечерва ќе се одржи свечена церемонија со која ќе се означи крајот на шеснаесетгодишното владеење на „muti“ (мама) Меркел. Таа официјално ќе му ја предаде функцијата на Олаф Шолц следната недела.
Војници со факли, прецизно дизајнирана кореографија и три песни избрани од Челичната Канцеларка, ќе ја испратат во заслужена пензија жената која 16 години го диктираше курсот на европската политика.
Церемонијата позната како „Großer Zapfenstreich“ (Големата приквечерина) ќе биде поскромна од претходните, на кои беа испратени канцеларите Герхард Шредер и Хелмут Кол, бидејќи пандемијата на коронавирус во Германија е во полн ек.
Во директен пренос на германската телевизија од 19:20 часот, церемонијата во дворот пред Министерството за одбрана во Берлин ќе започне со краток говор на канцеларката и ќе заврши по нешто повеќе од еден час, без свечен прием.
Обичајот на церемонијата датира од 16 век, но највисоката почест на германската војска им била доделена само на одредени канцелари.
Додека на зборувањето на Шредер присуствуваа 600 гости, Меркел покани само околу 200, вклучително и 52 министри што служеа во нејзиниот мандат.
Урсула фон дер Лајен, актуелната претседателка на Европската комисија и поранешен министер за семејство и одбрана во времето на Меркел, најверојатно нема да присуствува поради средбата со шефовите на јужноамериканските земји закажана за истиот ден.
На нејзината проштална забава ќе свири оркестарот на Бундесверот, кој ќе ги изведува нејзините омилени песни. Една од желбите на канцеларката во заминување е песната „Го заборави филмот во боја“ (Du Hast den Farbfilm Vergessen), која во 1973 година ја отпеа Нина Хејген, позната како „мајката на панкот“.
Втората песна по избор на канцеларката во заминување е „За мене треба да врнат црвени рози“ (Für mich soll’s rote Rosen regnen) во изведба на иконата на германската музичка сцена Хилдегард Кнеф.
Третата музичка желба на Ангела Меркел е „Голем Боже, тебе те славиме“ (Großer Gott, wir loben dich), екуменистичка христијанска песна од 18 век.
Изборот на канцеларката ги воодушеви граѓаните, со оглед на тоа што нејзините претходници избраа повеќе класични песни. Герхард Шредер сакаше да ја слушне „My way“ на Френк Синатра, додека пред него Хелмут Кол ја напушти функцијата во ритамот на Бетовеновата „Ода на радоста“.
За Меркел и официјално да му ја предаде власта на својот наследник Олаф Шолц следната недела, коалицискиот договор на новата влада ќе треба да биде одобрен од трите инволвирани страни.
Социјалдемократската партија (СПД) на Шолц в сабота ќе одржи партиски конгрес, на кој се очекува делегатите да го ратификуваат договорот со кој левиот центар ќе се врати на функцијата првпат од 2005 година.
Либералите (ФДП) ќе одржат гласање на дигиталниот конгрес еден ден подоцна, додека членовите на Партијата на зелените имаат рок до 6 декември да го одобрат или да го отфрлат договорот. Иако многу членови на еколошката партија ги критикуваа еколошките аспекти на договорот, отфрлањето се смета за малку веројатно.
Откако документот ќе биде одобрен од сите три партии, Шолц би можел да положи заклетва како следен лидер на Германија веќе в понеделник, 6 декември, а најдоцна до среда. Канцеларот во заминување ќе мора да ја претставува земјата в четврток на Самитот за демократија, чиј домаќин е американскиот претседател Џозеф Бајден.