Конкретно, договорот ветува дека ќе се дозволи двојно државјанство за мигрантите во Германија, што во моментов обично им е дозволено само на граѓаните на ЕУ и Швајцарија, како и забрзување и поедноставување на барањата за азил и дозволите за престој
Поради рестриктивните правила за двојно државјанство, Германија има една од најниските стапки на двојно државјанство во Европа
Двојно државјанство, обединување на семејствата на бегалците и повеќе визни можности – ова се само дел од ветувањата на партиите од новата германска владејачка коалиција.
Меѓу ветувањата наведени во коалицискиот договор од 177 страници, кој е објавен во средата од Социјалдемократите (СПД), Зелените и слободните демократи (ФДП, либерали), е и радикалната промена на законите за германско државјанство и миграција.
„Сакаме нов почеток во политиката на миграција и интеграција, како што треба да биде во модерна имигрантска земја“,
се вели во текстот.
Поради рестриктивните правила за двојно државјанство, Германија има една од најниските стапки на двојно државјанство во Европа, пренесува Дојче веле.
Конкретно, договорот ветува дека ќе дозволи двојно државјанство за мигрантите во Германија, што во моментов обично им е дозволено само на граѓаните на ЕУ и Швајцарија, како и забрзување и поедноставување на барањата за азил и дозволите за престој.
„Како коалиција сакаме да повлечеме линија под рестриктивната политика за азил од последните години и всушност да обезбедиме луѓето кои постојано живеат овде и ќе останат тука, да имаат можност да го консолидираат својот статус на престој, да влезат на пазарот на трудот, да имаат пристап до јазикот и тоа неселективно“,
изјави за ДВ пратеничката на Зелените, Луиз Амтсберг, нагласувајќи:
„Сите овие се клучни работи што се релевантни за модерна имигрантска земја ѝ нудат промена на парадигмата“.
Сепак, Ралф Бринхаус, шеф на демохристијанската парламентарна група (ЦДУ/ЦСУ), која сега е во опозиција, изрази загриженост дека на луѓето што дошле во Германија без правна основа ќе им биде дозволено да останат по некое време.
„Мислам дека тоа е многу погрешно“,
вели тој.
Сепак, претходно оваа година министрите за интеграција од 16-те германски провинции ја повикаа федералната влада да ги олесни правилата за државјанство. Во апелот, германската конференција на министри за интеграција (IntMK), започната во 2007 година за да ги координира провинциските и федералните пристапи кон прашањето за имиграцијата, силно се залагаше за законски измени во согласност со ветувањата на новата коалиција.
Најголема корист ќе имаат турските граѓани
Турците се една од групите што се најмногу погодени од новиот предлог за двојно државјанство, како и од поедноставениот процес на имиграција: во Германија има околу три милиони Турци или луѓе со турско потекло, од кои повеќето пристигнале во 1960-тите. Но, поради сегашните германски закони, помалку од десет отсто од тоа население има двојно државјанство, а според студијата на Центарот за американски напредок, 55 отсто од нив имаат само турско државјанство.
„Главната причина поради која Турците го избегнуваат германското државјанство е барањето да се откажат од турското. Тоа беше многу пораспространето меѓу постарите генерации бидејќи емотивната врска со Турција беше многу посилна“,
вели за ДВ Гилај Тирмен, социолог од Центарот за општествени науки во Берлин.
„Оваа промена дефинитивно ќе доведе до зголемување на бројот на барања за државјанство кај турското население, како што видовме во 2000 година, откако беше поедноставен процесот на натурализација“,
додава тој.
Пратеникот на Зелените, Амтсберг, ги обвинува демохристијаните за фактот дека многумина кои живеат во Германија немаат регулиран статус:
„Погледнете ги, на пример, авганистанските бегалци во Германија, од кои многумина немаа можност да си го обезбедат статусот на престој“.
Надеж за луѓето со „дулдунг“
Во договорот се споменува и побрз пат до постојан престој за младите кои покажале дека се „интегрирани“ во Германија. Овој забрзан процес за добивање редовна дозвола за престој би можел да биде важен за луѓето во моментов во Германија врз основа на „толериран престој“ (т.н. „дулдунг“), што значи дека во принцип тие треба да бидат депортирани, но тоа не е изводливо од различни причини.
„Поради ограничувањата од последниве години, околу 200 000 луѓе живеат со статус на толерирано живеалиште, а коалицискиот договор става неколку добри идеи на маса за тоа како повеќе од овие луѓе можат да го регулираат својот статус во Германија. На пример, со намалување на прагот за барање престој“,
објаснува за ДВ Вибке Јудит, советник на германската организација „Про азил“.
Таа смета дека предложените измени ќе им го олеснат животот на луѓето што веќе се во Германија.
За новите бегалци сѐ е исто?
Но, како што вели Џудит, „нашата најголема критика е што коалицискиот договор не го менува системот на прифаќање нови.“ Според тој систем, новите бегалци и оние без правен статус кои пристигнуваат во Германија се обврзани да поминат време во прифатен центар.
„Во последниве години, максималното време поминато таму се зголеми на 18 месеци. Овие центри се место на многу жаришта на коронавирус. Ние сме мошне загрижени што тие негативно влијаат на процесите за азил“,
вели таа.
„Навистина сме разочарани што коалицискиот договор не го скратува времето што луѓето го поминуваат во првите прифатни центри“,
додаде таа, истакнувајќи дека тоа може да се планира подоцна.
Џудит, исто така, истакна дека ништо не се споменува во однос на сегашниот систем на депортација, според кој болните и трауматизираните лица можат насилно да бидат протерани од Германија.
Но, од друга страна, повторното обединување на семејствата за бегалците ќе стане полесно. Во моментов, делумно поради пандемијата, се акумулираат барањата на оние кои се обидуваат да пристигнат во Германија да бидат со своите најблиски.
Овој коалициски договор се уште не е обврзувачки, ниту се наведени сите рокови за сите ветувања. Во секој случај, со оглед на се помеѓународниот профил на Германија, овие прашања остануваат од витално значење.
Социологот Гилај Туркман вели: Се проценува дека повеќе од една четвртина од луѓето во Германија имаат мигрантско потекло, така што мислам дека дефинитивно е време за овие промени.