СДСМ, кој во сите изминати години имаше свој градоначалник и мнозинство во Советот на Куманово, првпат заминува во опозиција во оваа општина, иако и овој пат има најмногу советници – десет, додека втората владејачка партија на централно ниво – ДУИ има четворица
Двете најголеми партии, СДСМ и ВМРО-ДПМНЕ, првпат ги сменија позициите во Советот на Куманово, откако досегашниот градоначалник Максим Димитриевски доби втор мандат на неодамнешните локални избори, а независната советничка листа која застана зад неговата кандидатура освои осум од вкупно 33 советнички места.
Ивана Ѓорѓиевска, која беше носителка на независната советничка листа, вчера е избрана за претседавач на Советот со мнозинство гласови, односно, според информации на „360 степени“, со 19 гласа поддршка. За неа освен советничката група на ВМРО-ДПМНЕ, која брои седум члена, гласале и советниците на Левица (1), Беса (1) и Алијанса за Албанците/Алтернатива (2).
СДСМ, кој во сите изминати години од почетоците на плурализмот имаше свој градоначалник и мнозинство во Советот на Куманово, првпат заминува во опозиција, иако и во овој состав на Советот има најмногу советници – десет, додека втората владејачка партија на централно ниво – ДУИ има четворица.
Атина Мургашанска од советничката група на СДСМ, која во минатиот состав претседаваше со Советот додека Димитриевски тогаш беше градоначалник од редовите на оваа партија, рече дека за нејзина наследничка е избрана „наводна социјалдемократка“ и дека сега се видело дека граѓаните на Куманово биле доведени во заблуда, затоа што изборните резултати на Димитриевски и на граѓанската листа „За наше Куманово“, како што оцени, биле креирани со помош на ВМРО-ДПМНЕ. Според неа, СДСМ, чија советничка листа освои најмногу гласови и мандати, на гласањето на 17 октомври треба повторно да го добие челното место во Советот.
„Ќе остане запаметено во историјата на локалното владеење дека првпат ќе биде избран претседавач на Советот на Куманово – наводен социјалдемократ, која за време на изборната кампања, заедно со своите колеги – наводни социјалдемократи, ги доведоа во заблуда избирачите дека ги застапуваат вредностите на социјалдемократијата, а сега се виде дека оваа победа се случи со помош на ВМРО-ДПМНЕ, како што впрочем се креира и изборните резултати“,
рече Мургашанска по вчерашниот избор на Ѓорѓиевска за претседавач на Советот.
Нарушувањето на „традиционалниот“ распоред на сили во Советот на најголемата општина во државата се случува во период кога од СДСМ дојдоа најави дека ќе му подадат рака на Димитриевски за враќање во партијата, од каде што првично беше најавено дека ќе биде исклучен поради независната втора кандидатура за градоначалник на Куманово. Сепак, нема информации дали Централниот одбор на СДСМ во периодот на изборната кампања воопшто донесе формална одлука за исклучување на Димитриевски од партијата. Тој, пак, неодамна изјави дека никој не може да го враќа во партија од која никогаш нема излезено.