Полскиот претседател Анджеј Дуда, во рамки на дводневната посета на земјава, денеска оствари средба и со собранискиот спикер Талат Џафери. На средбата, Џафери искажал особена благодарност за континуираната поддршка од страна на Република Полска за процесот на евроинтеграција на Република Северна Македонија.
„Тој рече дека нашето Собрание, и покрај дневните предизвици, продолжува со исполнување на стратегиските цели, меѓу кои е и развојот на добрососедската политика и домашната реформска агенда. Европската интеграција, продолжи Џафери, по членството во НАТО, останува клучен стратегиски приоритет, како единствена алтернатива за иднината на земјата“,
информираат од Собранието.
Претседателот Дуда истакнал дека Република Полска отсекогаш ја поддржувала аспирацијата на Северна Македонија за евроатлантска интеграција. Високиот гостин изрази благодарност за улогата на Република Северна Македонија во мигрантската криза, истакнувајќи дека полската гранична полиција ги имплементира искуствата што ги добила во нашата држава.