Откако десетици илјади македонски граѓани примија прва и втора доза во Србија, сега нашиот северен сосед одобрува и вакцинација со трета (засилувачка) доза за нашите државјани
Како што наведува српскиот портал „Новости“, повикувајќи се на информација добиена од Здравствениот дом во Врање, српските здравствени власти одобриле давање на третата, засилувачка доза од вакцината против ковид-19 за македонските граѓани, почнувајќи од 18.11.2021 година.
Од Здравствениот дом потсетуваат дека засилувачката доза на вакцината против ковид-19 им се дава на сите оние што ја завршиле примарната вакцинација.
Македонците најмногу се вакцинирале во Врање, за што сведочат бројките на дадените вакцини. Над 24 000 дози од првата и втората вакцина примиле граѓаните на Македонија, а сите тие сега можат да ја примат третата, засилувачка доза во новиот пункт за вакцинација во центарот на градот, пишуваат „Новости“.