Според шефот на државата, членството во Алијансата обезбедува предвидлива иднина која е основа и за демократските реформи, што понатаму влијае и врз економскиот раст и повисокиот животен стандард
Потпишувањето на заедничката декларација и целосното воено интегрирање премиерот Зоран Заев го оцени како историски ден, а министерката за одбрана порача дека денеска сме на крајот на патот од илјада милји, но и дека започнуваме нов пат за целосна модернизација на Армијата
Денеска официјално се заокружи процесот на целосно воено интегрирање на земјава во командните структури и во структурата на силите на НАТО. Процесот се заврши со потпишување на заедничка декларација од страна на претставници на воените сили на земјава и на Алијансата.
Церемонијата на свечено потпишување се одржа во претседателската вила на Водно, а потписите ги ставија началникот на Генералштабот, генерал-потполковник Васко Ѓурчиновски, и командантот на Врховната сојузничка команда на НАТО за трансформација генерал, Филип Лавињ.
На настанот присуствуваа претседателот и врховен командант, Стево Пендаровски, и министерката за одбрана, Радмила Шекеринска, кои имаа и свои обраќања.
Според шефот на државата, членството во Алијансата обезбедува предвидлива иднина која е основа и за демократските реформи, што понатаму влијае и врз економскиот раст и повисокиот животен стандард.
„Во потесна воена смисла, имаме корист и од споделувањето на знаење генерирано од Сојузничката команда за трансформација, како и од проширените можности за испраќање кандидати за образование и обука во другите НАТО членки. Експертизата која ја добиваме од постарите членки е од суштинско значење за понатамошно трансформирање на нашиот безбедносен и одбранбен систем. Во тој контекст, благодарни сме им на САД, Обединетото Кралство, Франција, Германија, Италија, Турција, како и на другите членки на Алијансата за билатералната соработка и помош“,
рече Пендаровски.
Шекеринска, пак, порача дека денеска сме на крајот на патот од илјада милји, но и дека започнуваме нов пат за целосна модернизација на Армијата.
„Покажеме дека нашето членство во НАТО не беше само политичка одлука, туку резултат на крупни реформи. Оваа цел успеавме да ја постигнеме за 19 месеци од потпишувањето и претставува најбрза воена интеграција во Алијансата“,
изјави Шекеринска.
На церемонијата се обратија и потписниците, генерал-потполковник Ѓурчиновски и генерал Филип Лавињ.
Според Ѓурчиновски, тоа што денеска успешно заврши интегративниот процес, практично ја отсликува напорната тридецениска работа што ја имавме како држава и Армија. Лавињ, пак, честиташе за брзото и успешно завршување на военото интегрирање на државата во Алијансата и нагласи дека Северна Македонија може да смета на солидарноста и поддршката на НАТО сојузниците.
„НАТО проширувањето се покажа како ефикасен механизам за одржување долгорочна стабилност и сигурност. Денеска изразуваме благодарност на Северна Македонија за придонесување за стабилноста во Југоисточна Европа и НАТО. Потпишувањето на заедничката декларација претставува не само значаен успех за вооружениет сили на Северна Македонија, туку и го потврдува јакнењето на Северна Македонија како доверлив и значаен партнер на Алијансата“,
изјави Лавињ.
На церемонијата не присуствуваше премиерот Зоран Заев, но тој се огласи преку владината прес-служба и порача дека ова е историски ден. Тој непосредно пред церемонијата за потпишување, во присуство на Шекеринска и на генералот Симеон Трајковски, во својот кабинет го прими Лавињ.
„Премиерот Заев, министерката за одбрана Шекеринска и генералот Лавињ, на средбата разговараа и за придобивките од членството на Северна Македонија во НАТО како придонесот за стабилноста во регионот кој гарантира инвестиции во државата, но и за придонесот на Северна Македонија во мисиите на НАТО. На средбата беше истакнато дека церемонијално потпишување на заедничката декларација е споделена чест и гордост од посветеноста на сите кои учествуваа во овој процес“,
соопштија од Владата.