Српската премиерка вели дека во интерес на просперитетот на регионот е овие земји да добијат датум за почеток на преговорите што е можно поскоро, но исто така е исклучително важно ЕУ да работи со БиХ за таа да не биде запоставена
Српската премиерка Ана Брнабиќ денеска ги повика сите на Балканот кои немаат пристапено во „Отворен Балкан“, вклучително и Косово, да се приклучат на иницијативата, истакнувајќи дека поканата е постојано отворена.
„Граѓаните што живеат во регионот ќе имаат неверојатна корист од оваа иницијатива“,
рече Брнабиќ, одговарајќи на прашања на 101. Рос-рот семинар на Парламентарното собрание на НАТО, „Евроатлантска интеграција, партнерство за мир и натамошни чекори во справувањето со преостанатите предизвици во Западен Балкан“, што се одржува во Собранието на Србија.
Брнабиќ изјави дека Србија им дава „полна поддршка“ на Северна Македонија и на Албанија да добијат датум за почеток на преговорите со Европската Унија, бидејќи тие тоа „целосно го заслужиле“.
„Во разговорите со партнерите од ЕУ секогаш нагласуваме дека во интерес на просперитетот на регионот е овие земји да добијат датум за почеток на преговорите што е можно поскоро, но исто така е исклучително важно ЕУ да работи со Босна и Херцеговина за да таа не биде запоставена“, кажа Брнабиќ.
рече Брнабиќ.
Зборувајќи за регионалната соработка, српската премиерка оцени дека мирот и безбедноста во регионот се основен услов за напредок за секоја земја, но и за целиот регион во целина.
„Секоја нестабилност во кој било дел влијае на целиот регион“,
крече Брнабиќ, додавајќи дека Србија ги почитува своите соседи и доследно го почитува немешањето во внатрешните работи на соседните земји.
Таа кажа дека иницијативата „Отворен Балкан“ претставува шанса за регионот во однос на зајакнување на инфраструктурата, слободата на движење на луѓе, стоки, капитал и услуги, но додаде дека иницијативата не е замена за евроинтеграциите.
„Иницијативата, секако, не е замена за евроинтеграциите кон кои се стреми Србија, но е обид во некои области да дејствуваме самостојно“,
изјави српската премиерка.
Зборувајќи за Косово, таа посочи дека во Приштина не гледа подготвеност за дијалог, за што сведочат „се поголемиот број напади врз Србите и фактот дека Приштина не сака да го исполни Бриселскиот договор“.
Таа нагласи дека Србија е воено неутрална држава која не се стреми кон членство во НАТО, но сака да го подобри дијалогот и партнерската соработка со Алијансата, во рамките на Партнерството за мир, со цел да се зачува безбедноста и стабилноста.