На семејствата на 15-те загинати во пожарот во модуларната болница во Тетово од 8 септември годинава, им е исплатена еднократна парична полош од Црвениот крст.
„Еднократната парична помош која беше соопштена на јавноста е веќе реализирана, средствата се веќе префрлени на трансакциските сметки на семејствата на загинатите лица, со што е даден скромен придонес во ублажување на последиците од настанатата трагедија. Со овој хуман чин се искажа висока општествена одговорност и грижа за населението во услови кога им е најпотребна“,
соопштија од Црвениот крст.
Истрагата за пожарот сè уште трае. Во последната изјава од обвинителство пред три дена соопштија дека нивните службеници од тетовското обвинителство сè уште работат на предметот отворен поради пожарот во модуларната болница на 8 септември во Тетово, при што животите ги загубија 14 луѓе.
„Јавните обвинители кои преземаат дејствија во насока на расчистување на причините за пожарот во модуларната ковид болница во Тетово, интензивно постапуваат. Се очекува во обвинителството да пристигнат извештаите од наредените вештачења, меѓу кои и вештачењето од експертите од Република Германија. Откако ќе се приберат материјалните и вербални докази, обвинителите ќе ги разгледаат и анализираат, ќе биде утврдено дали и каде постои кривична одговорност, по што ќе биде донесена и одлука за натамошниот тек на постапката“,
рекоа од обвинителството на 8 ноември.