Деновиве ќе се види дали ќе се избере нова анти-демократска, анти-Преспа, анти-НАТО и анти-ЕУ Влада, велат од владејачката партија, како реакција на прес конференцијата на лидерот на ВМРО-ДПМНЕ во врска со следните чекори по собирањето 61 потпис за иницијативата за изгласување недоверба на Владата
Христијан Мицкоски потврди дека го интересира само власт, по секоја цена, и дека не станува збор за никаква политичка идеја, нема никакви вредности, нема платформа, се вели во реакцијата од СДСМ, по прес конференцијата на лидерот на ВМРО-ДПМНЕ во врска со следните чекори по собирањето 61 потпис за иницијативата за изгласување недоверба на Владата.
„Денеска народот слушна од Мицкоски дека целта му била да руши Влада со политичка партија која е дел од актуелната влада – БЕСА, дека земјата ќе ја носел напред ама со анти-НАТО и анти-американски коалиционен партнер – Левица. На следниот состанок на масата на новата коалиција останува да ги стави фотографиите од Орце Камчев, Никола Груевски и Сашо Мијалков и да изјави дека заедно ќе го расчистуваат криминалот на ВМРО-ДПМНЕ“,
се вели во писмената реакција од владејачката партија.
Конфликтот на принципи, конфликт на ставови, конфликт на политики и конфликтот на вредности на сите овие политички субјекти кои ги споменува Мицкоски не може да испорача ништо за интересот на граѓаните, ниту пак за националните интереси на државата, додаваат од СДСМ и истакнуваат дека деновиве ќе се види дали ќе се избере, како што велат, нова анти-демократска, анти-Преспа, анти-НАТО и анти-ЕУ Влада.
Од СДСМ ги повикуваат на соработка и одговорно застанување на страната на демократската опција сите прогресивни демократски сили и сите пратеници кои се за европска иднина, за правда и економскиот напредок.