Рама на денешната прес-конференција во Белград рече дека на сите ќе им биде подобро доколку сите шест земји од Западен Балкан ѝ се приклучат на иницијативата
Премиерот на Албанија, Еди Рама, денеска во Белград изјави дека Албанија, Србија и Северна Македонија го повикуваат Косово да ѝ се приклучи на иницијативата „Отворен Балкан“ и дека несогласувањата треба да се решаваат со дијалог.
„Три земји, сите заедно, го повикуваат Косово да дојде и да работи со нас. Кога станува збор за несогласувањата, тие се решава со дијалог“,
им рече Рама на новинарите во Палатата на Србија во Белград.
Тој додаде дека на сите ќе им биде подобро доколку сите шест земји од Западен Балкан ѝ се приклучат на иницијативата.
Денеска во Белград во рамки на иницијативата „Отворен Балкан“ се сретнаа српскиот претседател Александар Вучиќ, вицепремиерот на Македонија Никола Димитров, албанскиот премиер Еди Рама, како и бизнисмени од трите земји и претставници на Атлантскиот совет.
Нашиот претставник Димитров денеска на прес-конференција новинарите го прашаа дали по резултатите на локалните избори постои ризик за учеството на С Македонија во оваа иницијатива, имајќи предвид дека можни се предвремени парламентарни избори и доаѓање на сегашната опозиција на власт, чиј лидер, како што рече новинарката, се изјаснил против оваа иницијатива.
„Интересен е контекстот во кој го споменавте зборот ‘ризик’ и ‘лидер на опозицијата’, бидејќи и во мојата глава ризикот го поврзувам со лидерот на опозицијата. Но, треба да кажеме дека секогаш е добро да имаме конкуренција, за тоа кој може подобро… Дури и ако некогаш дојде до промена на власта, што не е невообичаено, бидејќи сме демократија, ќе се следи волјата на граѓаните, а тоа е земјата да оди напред. Затоа не гледам некој брз ризик за мојата земја, РСМ да излезе од оваа иницијатива“,
рече Димитров.