Снимки од УСБ, кое во обвинителството го предал Зоран Милески Кичеец, се следните што ќе се слушаат во судницата за случајот „Рекет“.
Од него има три снимки од вкупно пет кои се предлагаат како доказ од обвинителството. Обвинителката Ивана Трајчева најави дека третата содржи приватни работи и ќе бара јавноста да се исклучи.
Но, одбраната не се согласува ниту со тоа јавноста да се исклучи ниту, пак, да се изведат само три снимки.
„Јас ќе кажам нешто во име на сите од одбраната. Бараме да не биде исклучена јавноста. Цело УСБ од Кичеец да се презентира. Да се види кој манипулира, кој нуди рекет, кој нуди поткуп, кој е изманипулиран“,
рече Катица Јанева.
Бојан Јовановски-Боки 13, исто така, реагираше во оваа насока.
„Неприватните и приватните разговори прифаќам да бидат пуштени пред целата јавност“, рече Боки.
И нивните адвокати реагираа и бараа да се изведат сите докази и јавноста да ги слушне.
Обвинителката Вилма Русковска, пак, не се согласи и рече дека двете снимки не се поврзани со случајот.
„Не е точно, законот вели дека треба да се изведат сите докази што ги има“, бурно реагираше Јанева додавајќи дека Русковска требало да мисли, дали се поврзани или не, пред да ги предаде до судот сите снимки.
„Колешке, Вие да мислевте немаше да бидеме во оваа судница“,
возврати Русковска на висок тон.
„И вие да не монтиравте случаи, немаше да бидеме во оваа судница“,
возврати уште погласно Боки кон Русковска.
Судијката Васка Николовска-Масевска, сепак, одлучи да ги изведе само трите снимки што ги предлага обвинителството, а кога ќе се пушти третата јавноста да биде исклучена.
Останатите снимки, рече таа, одбраната може да ги предложи како свои докази во дополнението на доказната постапката.
Токму за снимките од ова УСБ, Јанева на паузата од рочиштето им се обрати на новинарите и рече дека од нив треба да им стане јасно кој манипулира и кој што нуди и бара.