Шведската влада донесе одлука за нова седумгодишна стратегија, вредна 560 милиони евра, за поддршка на реформите во Западен Балкан и Турција. Од 560 милиони евра од фондот за периодот 2021-2027 година, 500 милиони се наменети за Западен Балкан, а 60 милиони за Турција, објави Амбасадата на Шведска во Белград.
Соработката со Западен Балкан ги вклучува Србија, Црна Гора, Босна и Херцеговина, Северна Македонија, Албанија и Косово.
Континуираната соработка со земјите од регионот ќе ги зајакне условите за демократски и инклузивен развој, се вели во соопштението и се додава дека новата стратегија на Шведска ќе ги интензивира напорите во областа на човековите права, демократијата, владеењето на правото, родовата еднаквост, инклузивниот економски развој, животната средина и заштита од климатските промени.
Шведската поддршка ќе биде фокусирана на зајакнување на мирни и инклузивни општества и на „градење обемни и долгорочни односи“ меѓу Шведска и земјите од регионот, се вели во соопштението.
„Развојот во соседството на Европската Унија е важен за Шведска и ЕУ. Во интерес на Шведска е да продолжи да соработува со земјите од Западен Балкан за да придонесе за демократски развој, со фокус на човековите права, родовата еднаквост и владеењето на правото “,
вели во изјавата шведскиот министер за меѓународна развојна соработка Пер Улсон Фрид.
Шведска е еден од најголемите донатори на Западен Балкан. Според стратегијата, Шведска ќе продолжи да придонесува за поддршка на Европската Унија за реформската агенда на Западен Балкан и негово приближување со Унијата, се вели во соопштението.