Поранешниот американски претседател Доналд Трамп повеќе не е на списокот со 400 најбогати луѓе во светот, кој го објавува магазинот „Форбс“, што е првпат по 25 години да отпадне од ова престижно рангирање.
Богатството на Трамп се проценува на 2,5 милијарди долари, исто како и минатата година, што е за 400 милиони помалку отколку што имаше пред 10 години.
Минатата година Трамп беше 339. на листата, а според „Форбс“, богатството на Трамп стагнира, за разлика од другите чии богатства растат.
Според новинарот на „Вашингтон пост“, Трамп можел, кога станал претседател, да го продаде својот имот и да избегне плаќање даноци, односно во тоа време неговиот имот вредел над три милијарди долари.
На тој начин, како што се наведува, сега би имал шест милијарди долари.
Според најновата листа, најбогат човек на светот е Џеф Безос со 201 милијарда долари.