Во операцијата спроведена од 3 до 13 септември учествувале Унгарија, Словачка, Словенија, Хрватска, Романија, Грција, Србија, Босна и Херцеговина, Република Северна Македонија, Црна Гора и Албанија, како и Европол и Интерпол
Европската агенција за гранична и крајбрежна стража (Фронтекс) помеѓу 3 и 13 септември спроведе меѓународна операција против сериозен и организиран прекуграничен криминал во Централна и Југоисточна Европа заедно со австриските власти.
Операцијата, позната како „EMPACT Joint Action Day (JAD) Danube“, се фокусираше на борбата против шверцување мигранти, трговија со луѓе и измама со документи.
Од Фротекс соопштуваат дека во Виена бил формиран координативен центар за поддршка на размена на информации меѓу учесниците и за водење истраги за шверцување и трговија со луѓе како резултат на операцијата.
За нешто повеќе од една недела, акцијата доведе до апсење на 144 осомничени трговци со луѓе и откривање на 6 656 илегални мигранти, 76 лажни документи и 13 украдени автомобили
Од Фронтекс велат дека трговијата со луѓе е една од најпрофитабилните форми на организиран криминал, која генерира милијарди евра за криминалните мрежи.
„Фронтекс игра активна улога во борбата против овој криминал преку активности како што се Денови на заедничка акција, но и преку обука на граничари низ Европа. Агенцијата спроведува голем број операции и на меѓународни аеродроми, чија цел е откривање и заштита на жртвите на трговија со луѓе, особено деца. Заедно со експертите за превенција од трговија со луѓе низ Европа, Фронтекс создаде прирачник за граничари и персонал на аеродромите за да им помогне да ги забележат децата кои можат да бидат жртви на трговија со луѓе“,
велат од Фронтекс.
Во оваа операција на Фротекс учествувале Унгарија, Словачка, Словенија, Хрватска, Романија, Грција, Србија, Босна и Херцеговина, Република Северна Македонија, Црна Гора и Албанија, како и Европол и Интерпол.