Опозициската партија реагира откако спикерот Џафери откри дека во Собранието стигнало известување дека универзитетскиот професор треба да ја презентира својата платформа, за што веќе бил известен и претседателот на Комисијата за надворешни работи Милошоски од ВМРО-ДПМНЕ
Спасувачката мисија на Зоран Заев завршува со уште еден меѓународен бламажа, оценуваат од ВМРО-ДПМНЕ по веста дека универзитетскиот професор по право и некогашен министер за внатрешни и за надворешни работи, Љубомир Фрчкоски, заминува за амбасадор на земјава во седиштето на Обединетите нации во Њујорк откако не успеа обидот за негово испраќање во Вашингтон.
„Љубомир Фрчкоски е неприфатлив за амбасадор на САД, и доби црвено светло од Вашингтон. Заев, наместо да ја сфати пораката, го предлага за амбасадор во ОН. Спасувачката мисија на Заев завршува со уште еден меѓународен блам. Заев сака да го прати Фрчкоски во Њујорк, на територија на земјата која веќе го одби. Тоа е дипломатски аматеризам и дилетантизам“,
се наведува во реакцијата на ВМРО-ДПМНЕ.
Опозициската партија реагира откако денеска спикерот Талат Џафери откри дека во Собранието стигнало известување дека универзитетскиот професор треба да ја презентира својата платформа, за што веќе бил известен и претседателот на Комисијата за надворешни работи Антонио Милошоски од ВМРО-ДПМНЕ.
Според ВМРО-ДПМНЕ, „Заев предлага амбасадор во ОН, кој има сомнително криминално минато“.
„Фрчкоски беше посочен од криминалецот Љубомир Магаш ,како министер кој учествувал во шверцот на нафта и цигари во 1990-тите. Љубомир Фрчкоски е докажан женомразец и тепач на жени. Фрчкоски беше обвинет од сопствената сопруга дека ја тепал и малтретирал. Фрчкоски тепаше студенти на универзитетски кампус. Фрчкоски не може да биде амбасадор во ОН, најголемата организација која ги промовира и штити човековите права и мирот во светот. Тоа е исто како да пуштиш слон во продавница за порцелан.
Џафери изјави денеска дека Фрчкоски е именуван за амбасадор во меѓународна мисија, во контекст на блокадите во Комисијата за надворешни работи, што ја предводи опозицијата, за новоименуваните амбасадори да ја поминат последната фаза пред нивното заминување на функцијата. Џафери рече дека во петокот конечно завршила седницата на Комисијата за надворешни работи, која беше закажана во април, и дека четворицата нови амбасадори во Индија, Русија, Италија и во Австрија ги презентирале своите платформи.
„Додека од април се чека Милошоски да закаже продолжение на седницата за презентација на платформите на четворицата амбасадори, во Собранието стигна известување за тоа дека уште еден амбасадор треба да ја презентира програмата, а тоа е универзитетскиот професор Фрчкоски за Њујорк“,
рече Џафери на прашање на „360 степени“ околу кочењето на последната фаза, која е во надлежност на матичната собраниска комисија, пред заминувањето на амбасадорите во мисиите.
Тој рече дека именувањето амбасадори е исклучиво во надлежност на извршната власт, односно на Владата и на шефот на државата, така што не гледа логика во тоа што во собраниската комисија се кочи еден чин на отчетност, затоа што амбасадорите таму само ги презентираат своите тези, а нема гласање.