Оние што биле вакцинирани против коронавирус со вакцини на производителот „Модерна“ можеби нема потреба да се вакцинираат со засилувачка, трета доза, пишува порталот „Инсајдер“.
Американскиот Центар за контрола и превенција на болести (ЦДЦ) објави податоци собрани од болниците низ САД. Тие велат дека меѓу заразените што се хоспитализирани има помалку лица кои биле вакцинирани со вакцините на „Модерна“ отколку оние кои биле вакцинирани со вакцини произведени од „Фајзер/Бионтек“ или „Џонсон и Џонсон“.
Според месечниот извештај на ЦДЦ, вакцинацијата со две дози на вакцината „Модерна“ го намалува ризикот од хоспитализација за 93 проценти. Вакцините „Фајзер/Бионтек“ го намалуваат овој ризик за 88 отсто, додека вакцините на „Џонсон и Џонсон“ го намалуваат ризикот за 71 процент.
Д-р Роберт Атмар, кој го предводеше истражувањето за дополнителна вакцинација на Медицинскиот факултет во „Бејлор“, како што пишува „Инсајдер“, рече дека не би бил изненаден ако оние што претходно биле вакцинирани, на пример со вакцините на „Џонсон и Џонсон“, ќе треба да се вакцинираат со друга вакцина. Тој посочи дека останува отворено прашањето дали истото важи и за вакцините на „Модерна“.
Податоците истакнати во извештајот покажуваат дека вакцината на „Модерна“ штити од можноста за хоспитализација подолго од вакцините „Фајзер/Бионтек“ и „Џонсон и Џонсон“. Четири месеци по вакцинацијата, ефективноста на вакцината на „Модерна“ во намалувањето на ризикот од хоспитализација е 92 проценти, додека ефективноста на „Фајзер/Бионтек“ е 77 отсто и на „Џонсон и Џонсон“ е 68 отсто.
Вакцината на „Модерна“ се покажала како многу ефикасна кај постарите лица, чиј имунитет е послаб. Кај оваа популација, ризикот од хоспитализација е намален за 87 проценти, додека вакцината на „Фајзер/Бионтек“ кај оваа популација го намалува ризикот од хоспитализација за 77 проценти.
Вакцината на „Модерна“ против коронавирусот е исто така поефикасна кај луѓе под 65-годишна возраст. Од јуни до август оваа година, таа беше 99 проценти ефикасна за оние под 49 години, додека ефикасноста за оние на возраст од 50 до 64 години беше 91 процент.
Податоците се земени од 250 американски болници.