Бојан Јовановски-Боки 13 е во состојба да го следи судењето.
Ова е заклучокот од продолжението на денешното судско рочиште откако екипа на Брза помош дојде да го прегледа обвинетиот и откако во судот пристигнало известување од Клиниката за гастро потпишан од стручен колегиум кој навел дека Боки има хроничен гастрит, а нема елементи на малигни материјали. Исто така, во известувањето се препорачува преглед од дигестивен хирург, кој, како што извести судијката, ќе биде направен утре.
И лекарот во судница рече дека Јовановски е способен да го следи судењето.
Боки и адвокатот Сашко Дуковски жестоко реагираа бидејќи тврдат дека немало преглед на клиниката за гастро и дека пратениот извештај е фалсификат.
Боки бараше јавно да се прочитаат имињата на лекарите од колегиумот на Гастро кои го потпишале извештајот, па во еден момент од расправијата со судијката крена раце и рече: „Ако сакате, и обесете ме“.
Судијката Васка Николовска-Масевска, повикувајќи се на медицинската документација, рече дека судењето продолжува. Рочиштето е во тек и на него се читаат пораки од комуникацијата на Јовановаки извадена преку вештачењето на мобилниот телефон.