Таа се товари дека, во периодот од 21 јануари 2016 до 14 јуни 2017 година, со искористување на својата службена положба и со пречекорување на границите на службеното овластување, за правното лице „Јадран филм“ ДООЕЛ Скопје прибавила имотна корист од 68.000.000 денари.
Основното јавно обвинителство – Скопје поднесе обвинителен акт за кривично дело злоупотреба на службена положба и овластување против поранешната директорка на Агенцијата за филм. Таа се товари дека, во периодот од 21 јануари 2016 до 14 јуни 2017 година, со искористување на својата службена положба и со пречекорување на границите на службеното овластување, за правното лице „Јадран филм“ ДООЕЛ Скопје прибавила имотна корист од 68.000.000 денари.
„Спротивно на член 18 од Законот за филмска дејност, таа незаконито раководела со постапката за избор, исплата на одобрени парични средства и надзор над производството на филмски проект – играна серија од четири сезони, со наслов ‘Македонија’“,
соопштија денеска од Јавно обвинителство на Северна Македонија.
По објавен конкурс за финансирање проекти од национален интерес, на 21 јануари 2016 година, се појаснува во соопштението, обвинетата дала предлог за избор на проектот „Македонија“, а ваквиот предлог бил прифатен од Управниот одбор на Агенцијата за филм. На 10 февруари 2016 година, таа склучила договор со правното лице„Јадран филм“ ДООЕЛ Скопје за финансирање на проектот во износ од 283.000.000 денари без да обезбеди банкарска гаранција во висина од 25 проценти од износот на одобрени средства.
„Притоа, не биле приложени ниту потврда за обезбедени сопствени парични средства на ‘Јадран филм’ во износ од 17.988.750 денари, детален буџетски приказ со спецификација на планирани средства за реализација на секоја ставка по цена, количина и број, разработен план за снимање на серијата со наведено времетраење и локација, а не постоел ниту доказ за успешност, односно претходно продуцирани филмови од наведеното правно лице. Договорот бил склучен само врз основа на приложен концепт за серија наместо изготвено сценарио“,
стои во соопштението.
На 26 октомври 2016 година обвинетата склучила анекс-договор со кој го намалила бројот на епизоди во првата сезона од 25 на 14. Следниот ден, без претходно одобрение од УО, се нагласува во соопштението, склучила втор анекс-договор со кој дозволила однапред да се изврши исплатата на одобрени средства за првите две фази од првата сезона на проектот во износ од 68.000.000 денари, иако била обврзана исплатата да ја врши за секоја фаза одделно врз основа на претходно доставен и одобрен извештај за наменски потрошени средства со доказ за извршени исплати.
„ На 23 ноември обвинетата наложила исплата на износот, иако знаела дека ‘Јадран филм’ не постапил по Договорот, односно воопшто не ја спровел првата фаза од проектот – развој и подготовка, не создал услови за отпочнување на снимањето, не ангажирал директор на фотографија, актери, монтажер, костимограф, сценограф, опрема за снимање и камермани. На 14 јуни 2017 година, при постоење на истите околности, по претходна одлука на УО, обвинетата склучила трет анекс-договор со кој го продолжила времетраењето за производството на првата сезона и со тоа и нанела значителна имотна штета на Агенцијата за филм,
соопштија од обвинителството.
Истражната постапка во овој предмет прво ја водеше Основното јавно обвинителство за гонење на организиран криминал и корупција, но во текот на постапката се утврдило дека станува збор за кривично дело злоупотреба на службена положба и овластување, па предметот бил доставен во Основното јавно обвинителство – Скопје. По приемот на предметот, надлежниот јавен обвинител презел и дополнителни истражни дејствија, а по нејзино барање бил извршен и дополнителен распит на осомничената, по што до Основниот кривичен суд – Скопје е поднесен обвинителен акт.
Кон крајот на 2017 година, беше соопштено дека Управата за финансиска полиција поднела кривична пријава против поранешната директорка на Агенцијата за филм, Мими Ѓоргоска Илиевска. Тогаш беше соопштено дека постојат сомневања дека директорката го оштетила буџетот за 1,1 милион евра, во корист на лицето. В.Г., државјанин на Хрватска, и видеопродукцијата „Јадран Филм“ од Скопје.