Групата жени протестираа пред Министерството за женски работи, кое вчера талибанците го укинаа и преименуваа во Министерството за промовирање на доблест и спречување на пороци
Голем број Авганистанки денеска повторно излегоа на улиците низ Кабул да ги побараат правото на работа и студирање, спротивставувајќи му се на сè помрачниот талибански исламистички авторитаризам, јави ДПА.
Група од дваесетина активисти за женски права се собраа пред зградата што до неодамна беше Министерство за женски работи во авганистанскиот главен град Кабул, скандирајќи „женски права и човекови права“.
Талибанците вчера го укинаа токму Министерството за женски работи и го заменија со Министерството за промовирање на доблест и спречување на пороци, своевидно седиште на верската полиција, чија улога е да ја спроведе јавната пристојност и да се придржува до строгото толкување на исламот од страна на талибанците.
Тие веќе им забранија на девојчињата да посетуваат средно училиште и на универзитетите им наложија да ги одделат часовите по пол, но, од друга страна, не откриваат за тоа колку индивидуални слободи планираат да им доделат на жените.
По заземањето на власта од талибанците, авганистанските жени одржаа неколкудневни протести низ целата земја во кои побараа од тврдокорните исламисти да ги почитуваат нивните човекови права. Меѓутоа, протестите беа насилно задушени.
За време на претходниот режим на талибанците, во 1990-тите, застрашувачката верска полиција јавно ги удираше и тепаше жените кои се осмелуваа да излезат надвор без да го покријат целото тело.