Шекеринска се осврна и на процесот на евроинтеграцијата, посочувајќи дека застојот не оди во прилог на заложбите за стабилен Западен Балкан, информира Министерството за одбрана
Министерката за одбрана, Радмила Шекеринска, во текот на посетата на САД се сретна со секретарот за одбрана, Лојд Остин. Ова е прва средба на највисоко ниво со новата американска администрација, напиша Шекеринска на својот профил на „Фејсбук“.
„Благодарност што и покрај строгите ковид рестрикции во Пентагон, ја направи возможна средбата, со што на најдиректен начин даде потврда за пријателството и сојузништвото меѓу Северна Македонија и САД“,
напиша Шекеринска.
Од Министерството за одбрана информираат дека Шекеринска го запознала министерот за одбрана на САД со тековните процеси во одбранбената сфера и ги истакна позициите на државата во геополитичките процеси во регионот.
Потенцирајќи го успехот постигнат со членството на Северна Македонија во НАТО, посочила дека тој се должи на решителната политика, храбрите одлуки, но и на големата посветеност и работа во одбраната кои, во изминативе 30 години, носат и силен американски белег, се вели во соопштението на Министерството за одбрана.
„САД во целиот период од нашата независност беа и останаа наши најсилни поддржувачи и стратешки партнери“,
рече министерката.
Изразувајќи задоволство од средбата, се додава во соопштението, секретарот за одбрана Остин истакна дека сојузништвото со Северна Македонија високо се цени и е од исклучително значење за САД. Тој се заблагодари за долгогодишното партнерство и соработка во одбраната и нагласи дека тоа ќе продолжи да се развива со уште посилен интензитет.
Шекеринска се осврнала и на процесот на евроинтеграцијата, посочувајќи дека застојот не оди во прилог на заложбите за стабилен Западен Балкан.
„Застојот во евроинтеграцијата на Северна Македонија ја поткопува довербата во европските вредности и во храбрите одлуки што ги направивме како држава за да ги отстраниме препреките на тој пат. Сметам дека силен и координиран европски и американски ангажман би довел до позитивно придвижување и надминување на статус-кво во процесот, со што ќе се врати довербата во него и ќе се оневозможат влијанијата од трети страни“,
рече Шекеринска.
Шекеринска во Пентагон се сретна и со Колин Кал, потсекретар за политички прашања. На средбата стана збор за состојбата во Авганистан, новите предизвици во сајбер безбедноста, блокадата на преговарачкиот процес со ЕУ и заедничкото развивање на Криволак како НАТО полигон за армиски вежби, информира Министерството за одбрана.