Македонскиот документарен филм „Медена земја“ не успеа да освои Оскар на 92-то доделување на престижните филмски награди, кое се одржа утрото во театарот „Долби“ во Лос Анџелес.
Фаворизираната „Американска фабрика“ на продуцентската куќа на Барак и Мишел Обама и апсолутниот победник на годинашните „Оскари“, јужнокорејскиот филм „Паразит“ стигна до златните статуетки за најдобар документарен филм, односно за најдобар странски филм.
„Медена земја“ е првиот документарец номиниран за Оскар во две категории, со што испиша ново поглавје во историјата на македонската култура и кинематографија.
ФИЛМСКАТА ЕКИПА И АТИЏЕ СЕ ГОРДЕАТ СО УСПЕХОТ И СЕ БЛАГОДАРНИ ЗА ПОДДРШКАТА
Тимот на „Медена земја“, веднаш по прогласувањето на добитниците на наградите, се заблагодари за огромна поддршка од публиката и за честа што им беше укажана со двете номинации од Американската филмска академија.
„Пред сѐ, сакаме да се заблагодариме на сите што нѐ бодреа и веруваа во нас. Сепак, и покрај тоа што „Медена земја“ не доби ‘Оскар’, сосема сме свесни за големината на овој филм, за значењето на пораката што ја пренесува, за силата на бескрајните приказни што се кријат во оваа земја и за многуте наши талентирани уметници кои знаат како тие приказни да ѝ ги покажат на публиката. Почестени сме што бевме номинирани покрај овие одлични филмаџии со смели приказни кои им се обраќаат на луѓето од целиот свет, на универзалниот јазик на кинематографијата. Не можеше да се предвиди дека нашиот филм ќе влезе во историјата на Македонија и во историјата на номинациите за Оскар. ‘Медена земја’ истовремено беше номиниран во две категории, за најдобар документарен и за најдобар интернационален филм, затоа што универзалноста на приказната и јазикот на филмот ја даваат неговата компетентност и сила да се натпреварува со останатите номинирани. Кога го промовиравме филмот на фестивалот ‘Санданс’, пред повеќе од една година, не се ни надевавме дека ќе стигнеме толку далеку. Им се заблагодаруваме на сите што веруваа во нашиот мал филм и нè поддржуваа, а особено му се заблагодаруваме на дистрибутерот ‘Неон’ за вербата во моќта на кинематографијата и во смелото раскажување приказни. На крај, би сакале да ѝ се заблагодариме на нашата водечка ѕвезда, Атиџе Муртова што ни дозволи да влеземе во нејзиниот прекрасен свет. Филозофијата на Атиџе ‒ земи половина, остави половина ‒ е едноставна, но длабока. Тоа е порака во којашто може да се пронајде секоја публика. Горди сме што сме гласниците на таа порака“,
пишува во пораката до јавноста која ја испрати екипата на „Медена земја“.
И ѕвездата на документарецот, Атиџе Муртова, од Лос Анџелес посочи дека благодарение на екипата и на филмот нејзиниот живот драстично се променил и се подобрил. Сепак, таа изрази очекување и надеж дека публиката ќе успее да ја реализира нејзината порака која е суштински елемент на филмот.
„Како што јас споделувам со своите пчели, така сакам и сите луѓе да споделуваат едни со други“,
вели Атиџе.
Документарниот филм во режија на Љубомир Стефанов и Тамара Котевска е третото остварување од Македонија номинирано за „Оскар“ по „Пред дождот“ на Милчо Манчевски и „Дае“ на Столе Попов.
„Медена земја“ ќе биде забележана и во аналите на самите „Оскари“, како прв филм номиниран и за најдобар странски филм и за најдобар документарец.