За државјаните на Северна Македонија се предвидени 4 750 визи, а според германската амбасадорка за само неколку часа имало дури 50 000 прегледи
Од 1 септември во Германија стапи во сила последователна регулатива за граѓани од Западен Балкан за добивање работна виза. Како што информира германската амбасадорка во Скопје, Анке Холштајн, по објавувањето на оваа регулатива на нивната веб-страница за само неколку часа имало преку 50 илјади прегледи.
„Сојузната влада овозможи за државјани од Северна Македонија (како и од Албанија, Босна и Херцеговина, Косово, Црна Гора и Србија) привилегиран пристап кон германскиот пазар на труд. Ова и понатаму се однесува на секој тип работа – независно од признатата квалификација. Согласно германската законска регулатива, во целиот регион на Западен Балкан смее да се доделат 25 илјади визи годишно, од нив Северна Македонија добива годишна квота од 4 750 визи“,
пишува германската амбасадорка во Скопје, Анке Холштајн на фејсбук-профоилот на германската амбасада.
Како што пишува Холштајн, гледано според бројот на жители, на граѓаните од Северна Македонија, исто така поради големиот интерес има натпропорционален удел на располагање.
„Но, бидејќи истовремено интересот за оваа програма е огромен (нашата објава од понеделникот само за неколку часа имаше над 50 000 прегледи), се разбира дека знаеме дека само еден дел од заинтересираните може да добијат можност. Сегашниот систем на доделување термини, кој впрочем се користи во сите шест земји од регионот, треба да ѝ овозможи на Амбасадата, ограничената понуда на термини за поднесување барања по можност да ја реализира широко распространето“,
вели Холштајн.
Таа ги повика граѓаните за разбирање и нагласи дека постојано се работи на подобрување на доделувањето на термините, за тоа да биде потранспарентно за граѓаните.