Реакција на опозициската партија следува откако Груби во коментарот за договорената соработка со албанската опозицијата рече дека едвај го чека денот да види како поддржувачите на Алијанса за Албанците ќе гласаат за Никола Груевски и за Христијан Мицкоски, а како сите патриоти од ВМРО-ДПМНЕ и поддржувачи на „Скопје 2014“ ќе гласаат за Зијадин Села
Опозициската ВМРО-ДПМНЕ му одговори на првиот вицепремиер и член на претседателството на ДУИ, Артан Груби, кој денеска рече дека коалицијата на опозициската партија од македонскиот блок со Алијанса за Албанците и Алтернатива е несвојствена.
Од ВМРО-ДПМНЕ велат дека ја разбираат паниката и на СДСМ и ДУИ од окрупнувањето на опозицијата во пресрет на изборите, но и го потсетува Груби на заедничкото владеење, од кога датира и проектот „Скопје 2014, кој првиот вицепремиер денеска го спомена во изјавата.
„Кога господинот Груби зборува за некои минати времиња, вредно е да го спомнеме следното: Ги паметиме со насмевка деновите кога Артан Груби секојдневно беше дел од ентериерот во седиштето на ВМРО-ДПМНЕ, а при таквите посети не можеше да го скрие неговото воодушевување. Воедно Артан Груби важи и за еден од првите најбрзи пратениците кога на времето го притискаше копчето за гласање на владите на ВМРО-ДПМНЕ. Најдобар портпарол во моментов на СДСМ е Артан Груби. Господинот Груби е познат по неговите чести трансформации, при што веруваме дека за многу брзо време јавно ќе се кае за овие негови инсинуации“,
велат од ВМРО-ДПМНЕ.
Ваквата реакција на опозициската партија следува откако Груби во коментарот рече дека едвај го чека денот да види како поддржувачите на Алијанса за Албанците ќе гласаат за Никола Груевски и за Христијан Мицкоски, а како сите патриоти од ВМРО-ДПМНЕ и поддржувачи на „Скопје 2014“ ќе гласаат за Зијадин Села.