Камчев останува во Шутка: Судот ја одби гаранцијата

Адвокатите на бизнисменот имаат рок од три дена да поднесат жалба до Апелација

Бизнисменот Јордан Камчев останува во притвор во затворот „Скопје“ во Шуто Оризари. Кривичниот совет во Основниот кривичен суд ја одбил понудената гаранција од речиси 2 милиона евра, потврдија од судот.

По ваквата одлука на Кривичниот суд, одбраната на Камчев има право да поднесе жалба до Апелацискиот суд во Скопје во рок од три дена, кој почнал да тече од вчера.

Гаранцијата што ја нудеше Камчев се состоеше од нешто повеќе од 1,7 милион евра во имот и 200 000 евра во готовина. Минатата недела ваквото барање на прес-конференција го соопшти адвокатот Еленко Миланов, кој рече дека неговиот клиент треба барем да биде пуштен во куќен притвор, иако ставот на одбраната е дека тој треба да се брани од слобода со оглед на гаранцијата.

Камчев по вторпат ќе се обиде со гаранција да излезе од Шутка

Ова беше втор обид на Камчев со гаранција да излезе од Шутка, каде што се наоѓа од средината на март годинава, како еден од осомничените во случајот „Плацови на Водно“.

Судскиот процес за овој предмет започна на 16 јули, кога обвинителката Лиле Стефанова ги даде воведните зборови. Последните две рочишта се одложија, прво (на 30 август) поради тестирањето за ковид-19 на обвинителката Лиле Стефанова, а потоа (2 септември) и поради отсуство на адвокатот на мајката на Камчев, Ратка Куновска-Камчева, која исто така е една од обвинетите. Следното рочиште е закажано за 10 септември.

Апелација одби да го пушти Камчев од Шутка со гаранција од речиси 5 милиони евра

Во предметот обвинети се и експремиерот Никола Груевски, бившиот директор на УБК, Сашо Мијалков, Ристо Новачевски и Ненад Јосифовиќ.

Според обвинението, во периодот од јуни 2006 до октомври 2012 година, Груевски како лидер на партија наместо да прикаже пари како примени донации во ВМРО-ДПМНЕ, за себе прибавил 1,3 милион евра (79 972 140 денари), а потоа ги пуштал во оптек и купувал парцели на Водно. Станува збор за земјиште на кое имало шума, а кое со промените во Генералниот урбанистички план (ГУП) било пренаменето во градежно. Покрај имотот на Водно, обвинението опфаќа и два стана во главниот град и две парцели во Крушево за кои обвинителството тврди дека се прекривал вистинскиот сопственик.

Груевски е обвинет за делата перење пари и противправно стекнување и прикривање на имот. Камчев, неговата мајка, како и Новачевски и Јосифовиќ се товарат за перење пари, додека Мијалков е обвинет за помагање во делото перење пари.