Во соопштението од МОН посочуваат дека строго се почитуваат планот и протоколите за заштита и ги повикуваат наставниците, родителите и раководствата на училиштата доколку се сомневаат за позитивен случај веднаш да алармираат до здравствените установи и епидемиолошките служби
Според податоците на Министерството за образование и наука, добиени од раководствата на училиштата на втори септември, само 0,01 % меѓу учениците се активни случаи на ковид-19, а ист е процентот и кај наставниот кадар.
Денешното соопштение на МОН следува откако вчера повеќе медиуми објавија дека се пријавени првите случаи на заразени ученици, по само два дена од почетокот на учебната година, која започна со физичко присуство по една и пол година учење на далечина.
„Во училиштата строго се почитуваат планот и протоколите за заштита. Учениците, наставниците и другиот помошно-технички персонал во училиштата задолжително носат заштитни маски во затворен простор, задолжително се мери телесна температура на влез во објектите и се прави дезинфекција на рацете. Исто така, постојано се проветруваат училниците и се прави честа дезинфекција на клупите и подовите. Брзата реакција и почитувањето на мерките е најдобрата заштита. Ги повикуваме наставниците, родителите и раководствата на училиштата доколку се сомневаат за позитивен случај веднаш да алармираат до здравствените установи и епидемиолошките служби кои ќе постапат согласно алгоритмите“,
велат од МОН.
Досега само директорот на основното училиште „Ѓорѓија Пулевски“ од скопската општина Аеродром потврди дека кај нив има случај на ученик позитивен на ковид, поради што сите деца што не прележале и не се вакцинирани ќе одат во 14-дневна изолација и ќе следат настава на далечина, додека наставникот кој е вакциниран ќе продолжи да доаѓа на работа.
Од Министерството за здравство велат дека добиле податоци за вакви случаи и повеќе детали најавија за денеска.
Во учебната 2021-2022 година настава во основните и средните училишта, според МОН, посетуваат околу 257 илјади ученици.