Иако повеќе медиуми објавија за случаи на ученици позитивни на коронавирус уште по првиот училишен ден, засега само директорот на основното училиште „Ѓорѓија Пулевски“ во скопската општина Аеродром потврди дека кај нив има еден случај кој е пријавен и во Комисијата за заразни болести
„360 степени“ упати прашања и до Министерството за образование и до Министерството за здравство дали имаат податоци за пријавени позитивни случаи на ученици, но до овој момент не добивме одговор
Ученик од петто одделение од основното училиште „Ѓорѓија Пулевски“ во Аеродром вчера добил позитивен тест на ковид-19. Ова е првиот случај за кој потврда даде директорот на училиштето Марјан Јовановски.
„Ученик што посетувал настава вчера на 1 септември, во текот на денот добил резултат и од родителите е пријавено дека е позитивен. Денеска е стапено во контакт со Комисијата за заразни болести, односно епидемиологот надлежен за Аеродром и добиена е насока сите деца, кои не прележале или не се вакцинирани од вчера да одат во 14 -дневен карантин и паралелно ќе се следи наставата на далечина. Наставникот е вакциниран и тој ќе си продолжи на работа“,
изјави тој за Канал 5.
Повеќе медиуми објавија за позитивни случаи и во други училишта, но официјална потврда како од училиштето во Аеродром оттаму нема.
„360 степени“ упати прашања и до Министерството за образование и до Министерството за здравство дали имаат податоци за пријавени позитивни случаи на ученици, но до овој момент не добивме одговор.
Од МЗ за Фокус попладнево изјавиле дека пријавени се неколку сомнителни случаи за кои во тек се епидемиолошки анкети и проценка колку деца и наставници ќе одат во изолација. Подетални информации за тоа колку позитивни деца има во училиштата најавуваат за утре.