Според националниот координатор за стратешки комуникации во Владата, кога граѓаните ги имаат на увид сите факти, на креаторите на дезинформации ќе им биде многу потешко да манипулираат
Националниот координатор за стратешки комуникации во Владата, Марјан Забрчанец денеска учествуваше на панелот „Во борба против дезинформациите со информации: Обезбедување безбедност преку факти“, во рамки на Бледскиот стратегиски форум кој оваа година беше посветен на „Иднината на Европа“.
Забрчанец говореше за искуствата во нашата земја која особбено беше изложена на дезинформации во врска со уставните промени и референдумот, договорот од Преспа, изборните периоди и за време на целиот период на спроведување на реформските процеси во земјата.
Ширењето на дезинформациите не ја заобиколија ниту мигрантската криза, а се актуелни и сега, во случајот со хуманитарната криза во Авганистан и со бегалците од оваа земја.
Лажните вести и дезинформации се активни и во текот на целата пандемија со ковид-19 и особено во актуелниот период кога во земјата се спроведува масовната вакцинација која се опструира токму со дезинформации.
„Дезинформациите и лажните вести се сериозна закана за демократијата и демократските процеси и за справување со овие појави Владата креираше акциски план со насоки за препознавање и за демистификација и ги покани сите засегнати страни да се вклучат во постојаното усовршување на планот за успешна и ефикасна борба против дезинформациите“,
истакна Забрчанец.
Она што според него мможе да ја „промени играта“ во борбата со дезинформациите е активната транспарентност наместо реактивната и дефанзивна стратегија.
„Владите, граѓанските и меѓународните организации кои се обединети во заедничката борба против дезинформациите, наместо да живеат во страв, треба да бидат проактивни во промоцијата на демократските вредности и со активна транспарентност да ги елиминираат влијанијата на дезинформациите. Кога граѓаните ги имаат на увид сите факти, на креаторите на дезинформации ќе им биде многу потешко да манипулираат. Тие информации најтранспарентно треба да се обезбедат, да се продуцираат, да се публикуваат и промовираат“,
потенцира Забрчанец и додаде дека со дополнителна интензивна меѓусекторска соработка, како и со стратегиска програма за медиумска писменост се создаваат услови за заедничка и ефикасна промоција на демократските вредности како противтежа на дезинформациите.
На крајот, Забрчанец рече дека информациската војна меѓу поддржувачите и противниците на демократијата ќе ја добијат оние кои имаат јасен концепт и јасна визија за иднината и за развојот на општеството.