Според премиерот, бројот на вакви реакции е мал, бидејќи поголем дел од попишувачите се вакцинирани, како и 50 отсто од граѓаните над 40 години
Доколку некој не сака да ги прими попишувачите затоа што не се вакцинирани, ќе се прават рокади за да може процесот да се одива нормално, најави денеска премиерот Зоран Заев.
Тој не очекува проблеми со спроведувањето на операцијата и најави флексибилност.
„Разговарав со министерот за правда и во една прилика и со директорот на Заводот за статистика каде што секако кога ќе се случат вакви ситуации може да се направи рокада на попишувачите за да може флексибилно да излеземе пред се во барањата и очекувањата на граѓаните“,
изјави денеска Заев, според кого мал е бројот на ваквите реакции, затоа што и поголем дел од попишувачите се вакцинирани, и над 50 проценти граѓани над 40 години се исто така вакцинирани.
Пописот ќе почне во недела, на 5-ти септември, и ќе трае до 30-ти септември. До тој ден ќе трае и онлајн пописот на дијаспората што почна на 1 март.
До денеска претпладне, во дијаспората се попишани 190 890 граѓани.