Коментирајќи за симнувањето на државата од листата на безбедни земји за патување, поради ситуацијата со ковид-19, министерот рече дека олеснителна околност е и тоа што превозниците при влез во државата се изземени од владините мерки
Не се очекуваат проблеми за транспортерите во наредниот период, изјави денеска министерот за транспорт и врски Благој Бочварски одговарајќи на новинарско прашање за транспортот на стоки, откако државава е симната од листата на безбедни земји за патување во ЕУ.
Бочварски истакна дека досега успешно функционирале „зелените“ коридори. Според министерот, регионот одлично соработува, а помогнала и владината одлука, донесена на барање на здруженијата на транспортерите, да не се возачите да не се подложуваат на тестирања и карантин при влез во земјава.
„Транспортерите транзитираат непречено. На седницата на Владата во вторникот, донесовме мерки за олеснување на транспортерите, посебно на возачите кои се изземени од протоколите на влез во државава, тоа е за домашните транспортери, но и за странските кои транзитираат. Правиме напори и преку зелените рути и коридори. Јас сум задоволен од досегашната соработка со целиот регион, зелените рути и тоа како профункционираа и верувам дека ќе продолжат со истото темпо, така што, во овој момент не очекувам дека транспортерите ќе имаат каков било застој или проблеми, зашто, тие во најголем дел од земјите се изземени од најголем број пртоколи кои се за граѓаните“,
изјави Бочварски.
Според одлуката на Владата, превозниците што се враќаат во државава не се обврзани на ПЦР или на брз тест на границите, ниту на седумдневен карантин, бидејќи се изолирани во своите возила.