Д-р Стевановиќ: Младоста не штити од ковид како што сметавме на почетокот на епидемијата

Во рок од два дена починаа двајца млади ковид-пациенти, кои биле хоспитализирани во исклучително тешка здравствена состојба на Инфективната клиника во Скопје

Петнаесегодишната пациентка од тетовското село Селце, која почина на Инфективната клиника во Скопје од компликации од ковид, била со тешка здравствена состојба и, иако лекарите ѝ овозможиле комплетна терапија, таа не успеала да ја победи болеста.

Малолетничка почина од ковид на Инфективната клиника во Скопје

„Пациентката пристигна на Инфективната клиника во исклучително тешка здравствена состојба. Таа била претходно примена и во тетовската болница, но имала многу брз развој на тешка клиничка слика. Тераписки беше комплетно покриена, така што немало што повеќе да се даде од лекови и не можел да се смени крајниот исход од болеста“,

вели директорката на Инфективната клиника д-р Милена Стевановиќ.

Таткото на починатото девојче во епидемиолошката анкета навел дека и мајката починала од последици од ковид-19.

Д-р Стевановиќ апелира до младите да бидат одговорни и да ги почитуваат мерките бидејќи, како што вели, младоста сама по себе не штити од ковид, како што се сметаше на почетокот од епидемијата.

„Имаме работа со тешка инфекција и мора да бидеме исклучително сериозни, независно од младоста. Младоста не нè штити така како што сметавме или се надевавме на почетокот на епидемијата“,

вели д-р Стевановиќ.

На Инфективната клиника во моментов се хоспитализирани 160 ковид-пациенти од кои 10 до 15 примиле една или две дози на вакцина. Според Стевановиќ, клиничката слика на оние што примиле вакцина е драстично полесна отколку кај невакцинираните.

„Пациентите што примиле вакцина, а се хоспитализирани, претежно се со други придружни коморбидитети поради кои мораме да ги надгледуваме“,

вели Стевановиќ.

Вчера почина и 22-годишен пациент од Куманово, кој најверојатно се заразил на свадба.

Дваесет и двегодишниот кумановец кој почина од ковид најверојатно се заразил на свадба

Пациентот не бил вакциниран и немал хронични заболувања, но во исклучително тешка состојба е примен на Клиниката за инфективни болести во Скопје, велат од Министерството за здравство за „360 степени“.

„Пред да побара болничко лекување, четири дена бил со висока температура. Во епидемиолошката анкета стои дека 10 дена пред лекарскиот преглед бил на свадба“,

велат од Министерството за здравство.