Освен земјава, ЕУ ги тргна од листата на безбедни земји и САД, Израел, Косово, Либан и Црна Гора
Европската Унија денеска ја отстрани С Македонија од ковид-листата на безбедни земји што може да значи построги гранични контроли за македонските државјани при влез во некоја од државите чкенки. Покрај земјава, од листата се отстранети и САД, Израел, Косово, Либан и Црна Гора.
Со оваа одлука, македонските граѓани, како и граѓаните на останатите земји кои се отстранети со последното ажурирање на листата, ќе се соочат со поголеми ограничувања при влез во некоја од земјите членки на ЕУ, особено за несуштински патувања. Оваа одлука на ЕУ не е обврзувачка за земјите-членки, бидејќи секоја од нив има свои правила за влез.
Некои земји, како што се Германија и Белгија, веќе ги означија САД со црвено и бараат тестови на коронавирус и карантин, додека Франција и Холандија ги сметаат САД за безбедна земја.
На европската „бела листа“ сега има 17 држави, вклучувајќи ги Албанија, Канада, Јапонија и Нов Зеланд.
Земјите членки на ЕУ, исто така, се советуваат постепено да ги укинат ограничувањата за патување за кинеските специјални административни области Хонг Конг и Макао.
Листата на безбедни земји на кои се најде и С Македонија беше усвоена од ЕУ на 15 јули, но таа подлежи на промени во зависност од тоа како се менува епидемиолошката состојба во државите.