Според некои шпекулации, Фатмир Лимани имал поддршка за кандидатурата од крилото околу поранешниот висок функционер и близок соработник на Али Ахмети, Муса Џафери
Фатмир Лимани, професор по историја и поранешен заменик директор на ЕСМ, денеска поднесе независна кандидатура за градоначалник на општина Кичево.
Лимани собра вкупно 420 потписи, што е повеќе од неопходните 350 потписи, потврдија од подрачното одделени на ДИК во Кичево, пренесува МИА. Во исто време, во оваа општина е регистрирана и првата независна советничка листа, чиј носител е Агим Садику.
„Денес ја имаме кандидатурата на Фатмир Лимани за градоначалник на Кичево на претстојните локални избори. Тој го собра неопходниот минимум од 350 потписи на граѓани и денеска официјално ја поднесе својата кандидатура. Во текот на денот е поднесено и првата независна советничка листа за која својот потпис го дадоа 372 граѓани“,
рече Младен Ванчоски од Подрачното одделение на ДИК во Кичево.
Ванчоски појасни дека граѓаните можат да ги доставуваат независните листи за собирање потписи за градоначалник или за советници до 30 август.
Лимани бил именуван за заменик-директор и за член на Управниот одбор на ЕСМ во 2011 година, каде што претходно бил член на Надзорниот одбор.
Според информации што пред неколку месеци ги објави Алсат, тој е внук на лидерот на ДУИ, Али Ахмети“. Лимани изјави тогаш дека причините поради кои ќе се кандидира како независен се поради неуспесите на ДУИ, а особено на сегашниот градоначалник на Кичево Фатмир Дехари.
Како што се шпекулира, Лимани имал поддршка за кандидатурата од крилото околу поранешниот висок функционер на ДУИ, Муса Џафери.
Лимани и Дехари се очекува да се соочат во изборниот ринг на 17 октомври, со оглед на најавите дека ДУИ во Кичево ќе оди со актуелниот градоначалник, кој ќе се натпреварува за нов мандат. Исто така, се очекува и овој пат зад кандидатурата на Дехари да застане и СДСМ, како што беше и на претходните избори, во 2017 година.
За ВМРО-ДПМНЕ, пак, е неизвесно дали и овој пат ќе оди со свој кандидат за Кичево, како што преферираше во сите претходни циклуси или, пак, евентуално ќе го поддржи кандидатот на Алијанса за Албанците, доколку има договор за соработка со оваа партија на изборите.