Генерално, во државата речиси и да нема активни пожари. Скопските и гостиварските пожарникари ноќеска имале само по една интервенција, а во Берово е изгаснат пожарот во месноста на планината Готен, информира на денешната прес-конференција Илија Бојаровски од ЦУК.
Тој додаде дека има дојава за пожар во месноста Ветерско, меѓу Скопско и Велешко. Кон пожарот се упатени територијални противпожарни единици.
„До утрово имаме буквално стивнување на ситуацијата, но, секако, во државата има пожари. Главниот штаб на ЦУК е во постојано во заседавање и ја следи состојбата. Во Скопско, РЦУК известува дека двете жаришта кај селото Раовиќ и Буковиќ, на 150 километри од патот за Јасен, над селото Горна Матка, во 18:40 вчера бил изгаснат пожарот од страна на вработените во ЈП ‘Јасен’,
соопшти Бојаровски, кој потенцира дека поради специфичноста на теренот не се исклучува можноста од појавување на стари жаришта во зависност од правецот на ветрот.
Од Регионалниот центар за управување со кризи, РЦУК, Тетово, известуваат дека од територијалната противпожарна единица Гостивар ноќеска од 1:30 до 3:40 часот со едно противпожарно возило и тројца пожарникари интервенирале на запалена сува трева на поголема површина во Општина Врапчиште. Во гаснењето на пожарот учествувало и дел од месното население, информираа од ЦУК.