ДКСК побара денеска да се покрене иницијатива за утврдување одговорност на претседателот на Основниот суд во Кичево, кој беше пријавен дека го вработил својот син во судот
Антикорупциската комисија не најде судир на интереси кај техничкиот премиер Оливер Спасовски во случајот со бензинската пумпа во Куманово. Од ДКСК денеска објавија дека доскорешниот министер за внатрешни работи и актуелен премиер нема судир на интереси ниту, пак, финансиска поврзаност со отворање бензинска пумпа и станица за технички преглед.
Ваквиот заклучок е донесен едногласно, откако ДКСК постапуваше во овој предмет на лично барање на Спасовски, по пишувањето во одредени медиуми.
„Утврдивме дека поранешниот министер нема никаква поврзаност со сопственичката структура на бензинската, за што на негово барање се постапува и во однос на неговата имотна состојба. Што се однесува на судирот на интереси помеѓу советникот на министерот и еден од сопствениците на бензинската пумпа констатиравме дека целата постапка е спроведена според законот за возила и испочитувани се сите процедури во МВР, а наводите не се потврдени“,
истакна Владимир Георгиев, член на ДКСК.
Комисијата постапувала по предметот кој се однесува на изборот на внуката на поранешниот претседател на Советот на јавни обвинители Коле Штерјов, Марија Георгиева, за што утврдиле дека Штерјов гласал воздржано на седницата. Со тоа овозможил да биде избрана обвинителката. Оправдувањето од Советот било дека ако се изземел Штерјов немало да има кворум и немало да биде избрана Георгиева. ДКСК побарале Советот на ЈО да поведе постапка за утврдување на одговорност при што добиле одговор дека нема никаква одговорност.
Судир на интереси и покренување иницијатива за одговорност ДКСК денеска едногласно утврди и во постапката по пријава на физичко лице дека претседател на Основниот суд во Кичево го вработил својот постар син во судот и дека енормно е збогатен со куќи, возила, дуќан за злато, кафеана, плацови…
Во однос на богатството, Комисијата отворила постапка во одделението за имотна состојба, која е во тек, а во однос на судирот на интереси, ДКСК утврдиле дека синот на претседателот на судот претходно бил вработен во Секретаријатот за спроведување на Рамковниот договор и со преземање заедно со други лица без јавен оглас е префрлен во судот. Спогодбата за преземањето на синот ја потпишал таткото, односно претседателот на Судот. Бидејќи претседателот на судот не постапил согласно законот, Комисијата побара да се покрене иницијатива за утврдување одговорност на претседателот на Основниот суд во Кичево.