Министерството за здравство демантира информација објавена на ТВ 24 дека најголем број од хоспитализираните поради ковид-19 на Инфективната клиника се вакцинирани со две дози
На Инфективната клиника во моментов се хоспитализирани 94 пациенти и само околу 10 отсто се вакцинирани со две дози вакцини и тие се со полесна клиничка слика, велат од Министерството за здравство, категорично демантирајќи информација објавена во вестите на ТВ 24 дека најголем број од хоспитализираните пацинети биле со примени две дози вакцина.
„Новинарката оваа невистинита информација ја потенцираше како ‘важна’, што предизвика серија реакции во јавноста. Жалиме што оваа информација денеска не беше проверена во Министерството за здравство, ниту пак во Клиниката за инфективни болести. Министерството за здравство стои на располагање на сите медиуми секој ден во тек на 24 часа и апелира сите информации да ги проверуваат и да ја информираат јавноста вистинито и точно. Министерството за здравство бара ТВ 24 да се извини и да ја повлече информацијата што денеска беше пласирана. Апелираме дека ваквите невистинити информации ја доведуваат јавноста во заблуда и создаваат уште поголем страв и паника кај граѓаните кои се уште имаат недоумица за вакцините. Процесот на имунизација е многу важен, а медиумите се наш сојузник во борба со ковид пандемијата. Ја поддржуваме слободната мисла, критичкото и истражувачко новинарство, но истото очекувано е да се темели на релевантни податоци и точни информации, бидејќи граѓаните тоа го заслужуваат“,
се наведува во демантот на МЗ.
ТВ 24 вечерва го објави демантот на Министерството, посочувајќи дека пласираната информација била ненамерна.
Во прилогот што го демантира МЗ, а кој стана вирален, беше објавено дека е важно дека најголем број од пациентите на Инфективната клиника во Скопје се целосно вакцинирани, а нема регистрирано пациенти кои веќе прележале ковид-19 повторно да се заразат.