Граѓаните кои сакаат да се вакцинираат против ковид-19 ќе може тоа да го сторат и во текот на утрешниот ден, сабота, соопшти Министерството за здравство.
„Секој работен ден освен во недела, ќе работат сите пунктови за вакцинација низ целата држава“,
велат од Министерството.
Во анализата за минатонеделниот период, Министерството евидентира дека смртноста е 100 отсто кај невакцинирани, односно ниту еден од сите 25 починати од ковид-19 не бил вакциниран.
Од 3 497 граѓани кај кои е потврден коронавирусот во изминатите седум дена, од 6 до 12 август, 450 односно 12,8 отсто биле целосно вакцинирани, а 87,1 проценти или 3047 граѓани од позитивните не биле вакцинирани.
Министерството за здравство соопшти дека почнува на неделно ниво да прави редовни анализи за процентот на вакцинирани меѓу позитивните случаи и починатите од ковид-19 во државата и ќе ги објавува секој петок за да ја информира јавноста.
Притоа, за вакцинирани се сметаат лицата што примиле две дози и поминале најмалку 14 дена од аплицирањето на втората доза.
Според статистики за состојбата со ковид во последните 24 часа, регистрирани се 672 нови случаи на ковид, а петмина се починати. Во истиот период се оздравени 35 лица.
Вкупната бројка на дијагностицирани со ковид во земјава од почетокот на епидемијата изнесува 16 571 бројката на оздравени пациенти е 150 670, на починати е 5 532, а бројот на активни случаи изнесува 4 369.