Во текот на вчерашниот ден е забележан значително зголемен интерес за вакцинација меѓу граѓаните, информира Министерството за здравство. Велат дека вакцинацијата се одвива непречено на сите пунктови низ државата, а во тек е и теренска вакцинација.
Заклучно со вчера вакцинирани се вкупно 552 263 граѓани. Прва доза вакцина вчера примиле 8 202 граѓани, а вкупно се вакцинирале 14 928 граѓани. Во државата вкупно се аплицирани 998 876 дози вакцини, а ревакцинирани се 446 613 граѓани, соопшти Министерството.
Како што се посочува, со последните бројки 66 отсто од населението над 70 години имаат примено барем една доза вакцина, 63 отсто од населението над 65 години е вакцинирано со барем една доза вакцина, 59 отсто од населението над 60 години е вакцинирано со барем една доза вакцина и 48 отсто од населението над 50 години е вакцинирано со барем една доза вакцина.
Граѓаните без закажан термин се вакцинираат во постоечките вакцинални пунктовите низ државата. Процесот на теренска вакцинација се одвива на територија на цела држава со ротации на медицински екипи во секое село и рурално населено место, населба. Сајтот вакцинација.мк е отворен за закажување на термини за вакцинација на децата.
„Вакцините се безбедни и ефикасни и се единствениот начин да се победи пандемијата. Само со комплетна вакцинација се спречува тешка форма на болеста, се намалува шансата од заболување, како и смртен исход од истата“,
стои во соопштението.