Пожарот во близина на селата Раовиќ – Буковиќ во Сарај гори веќе неколку дена и се прошири кон ловиштето Јасе, но засега огнот е под контрола. Како што информираат од Центарот за управување со кризи (ЦУК), активни се уште два пожари во земјава, едниот кај селото Дивље во Петровец и кај селото Топлица.
Раководителката на секторот за операции и координација при ЦУК, Марија Милкова, информираше за состојбата со пожарите до денеска до 11 часот. На трите активни жаришта интервенираат пожарникарите, припадници на Армијата, вработени во шумските стопанства.
За пожарoт во близина на Јасен, Милкова вели дека се држи под контрола за да не дојде до негово проширување.
„Таму интервенираат 20 припадници на Армијата, тројца вработени во шумското стопанство, како и вработени во Јасен, а на терен се и пожарникари од скопската Бригада. Намален е интензитетот и на пожарот кај Дивље и таму сè уште се интервенира со пожарникарите, вработените во шумското стопанство како и армиските војници. Со намален интензитет е и пожарот кај Топлица и до овој момент екипата се справува со гасење во нискиот дел од селото Ракле над местото викано Габо село, каде гори лисната постилка. Во високиот дел има само чадење, без пламени јазици. До овој момент немаат потреба од дополнителна помош“,
информираше Милкова.
Пожарот кој гореше кај местото викано Бeјаз Тепе во општина Пехчево, а потоа се префрли кај селото Будинарци во Берово е локализиран. Наведените екипи се на терен и вршат обиколка на веќе опожарената површина.