Бројот на хоспитализираини е 16 и сите се на кислородна поддршка, но поради тоа што инфективниот оддел нема многу соби, а доаѓаат пациенти и со други симптоми, од утре ќе се отвори и модуларната болница
Шестнаесет пациенти од Куманово, со компликации од ковид -19 болнички се лекуваат на инфективното одделение во општата болница, информираа денеска надлежните.
Речиси сите се на кислородна поддршка, со средно тешка клиничка слика, додека оние со полесна клиничка слика се лекуваат во дневната болница, а оние со лесни симптоми се на домашно лекување со терапија и под надзор.
Но, поради тоа што инфективниот оддел нема многу соби, а доаѓаат пациенти и со други симптоми, од утре ќе се отвори и модуларната болница.
„Проблем со овој бран е период на годишни одмори, претходно персоналот не користеше одмори, но сега се користат. Изминативе дена правевме прераспределба од други оддели, гледаме да е персонал кој има искуство од претходните бранови, ни останува да се надеваме дека нема да биде таков нагол скок на заболени“,
вели директорката на болницата, д-р Снежана Захариева.
Таа појасни дека сите одделенија во болницата ќе функционираат непречено, вклучително оперативниот и амбулантскиот дел на различните оддели во болницата.
И матичните лекари потврдуваат дека расте бројот на инфицирани.
Д-р Фатмир Асани, претседател на Здружението на матични лекари од Куманово изјави дека вирусот побрзо се шири и дека само во неговата амбуланта има триесетина пациенти кои се со коронавирус.