Од Министерството за внатрешни работи, изминатото деноноќие, биле ангажирани околу 588 полициски службеници
Од Министерството за одбрана, пак, во изминатите десетина дена од избувнувањето на пожарите, 1 500 припадници на Армијата се вклучија во справувањето со огнената стихија
Во текот на изминатото деноноќие во активностите за гаснење и превенирање на пожарите од Министерството за внатрешни работи биле ангажирани околу 588 полициски службеници, реализирани 222 мото-патроли и користени 175 возила, соопшти МВР.
Оттаму посочуваат дека деноноќно на терен се и припадниците на сите специјални единици на полицијата: Специјалната антитерористичка единица „Тигар“, Единицата за брзо распоредување и Посебната единица за поддршка, кои несебично помагаат во гасење на пожарите.
„На 09.08.2021г. поднесена е една кривична пријава од СВР Струмица во врска со пожар настанат на 08.08.2021г. кај крстосница с. Дабиле – с. Сачево, против Д.К. (30) од с. Баница, за сторено кривично дело „предизвикување општа опасност“. На 09.08.2021г. во полициското одделение Велушина – Битола, а во врска со пожар кој настанал на 09.08.2021г. во атар на с. Кишава, на службен разговор во полициска станица биле повикани четири лица на возраст од 21 до 27 години, сите од с. Кишава и се работи на расчистување на случајот“,
се наведува во соопштението на МВР.
МВР апелира строго да се почитува забраната за движење во шумските предели, граѓаните максимално да се воздржат од палење огнови, отпадоци, меѓи и стрништа, да не се фрлаат неизгаснати догорчиња и да не оставаат стаклени шишиња или други предмети, кои подолго време изложени на сонце, можат да предизвикаат пожар. Посочуваат дека неопходна е максимална будност и целосно одговорно однесување на секој поединец.
Од Министерството за одбрана, пак, информираат дека во изминатите десетина дена од избувнувањето на пожарите 1 500 припадници на Армијата се вклучија во справувањето со огнената стихија.