Во изминатите две недели изгаснати се околу 140 пожари, а денеска активни се петнаесеттина
Во Албанија активни се повеќе пожари на различни локации низ целата земја, а од денеска доби помош од Холандија и Чешка со цел жариштата да не се прошируваат на поголеми територии и да се стават под контрола.
Во гаснењето на пожарите кои беснеат во области од денеска вклучени се хеликоптери од Холандија и Чешка, информираше албанското Министертвото за одбрана.
„Од претпладнето во гаснењето на пожарите вклучени се и три хеликоптери од Холандија и Чешка и тоа во гаснење на реактивираното огниште на планината Дукат и на пожарот во селото Ѓорос во Фиер. Активни се повеќе пожари, дел од нив реактивирани, но ситуацијата е под контрола“,
информираа од Министерството.
Додаваат дека со хеликоптерите пристигнале и над 50 припадници на армиите на овие земји обучени за цивилни непогоди, кои се придружија на стотиците албански војници кои со денови се вклучени во гаснење на пожарите.
Моментно, според Министертвото, иако е ставен под контрола, состојбата е најкритична на островот Карабрун, каде пожарот е активен со денови, а од синоќа и пожарот во
близина на тунелот Калимаш.
Во изминатите две недели изгаснати се околу 140 пожари, а денеска активни се петнаесеттина. Поради сомнеж дека предизвикале пожари, кривични пријави се поднесени против 11 лица.