Градоначалникот на Симитли, Апостол Апостолов и претседателот на општинскиот совет Владимир Христов, ноќеска на границата со С Македонија ја проверуваа состојбата со пожарот помеѓу Делчево и Пехчево и се координираа за потребните активности за негово запирање на бугарска територија, пренесе МИА.
Според Апостолов, ситуацијата е многу сериозна, а силниот ветер што дува во областа на границата меѓу Бугарија и С Македонија дополнително ја отежнува ситуацијата. Тој рече дека бил во постојан контакт со властите во земјава, како и со пожарникарите од Благоевград вклучени во гаснењето на пожарот.
Апостолов вели дека Северна Македонија се организирала, има многу луѓе на терен, како и хеликоптери, но во моментов огнот не може да се запре. Според информациите со кои располага градоначалникот на бугарската општина Симитли, пожарот ги зафатил селата Негрево и Црник. Апостолов разговараше и со директорот на Претпријатието за шумарство Симитли, Благој Кишев, кој го увери дека ќе биде испратен булдожер до подрачјето на границата помеѓу двете земји за да се направат ископи и се запре огнот ако помине од границата со Бугарија.
Како што јавува МИА, веста за пожарот е централна тема за бугарските медиуми, кои потсетуваат дека нивната земја им помага на градовите Пехчево и Делчево во соседната држава.