Помошта следува по вчерашниот разговор на министерката Радмила Шекеринска со нејзиниот словенечки колега
Словенија испраќа 16 противпожарни возила и 46 пожарникари да помогнат во гасењето на пожарите низ земјава, соопштија од Министерството за одбрана. Тие се очекува да пристигнат најдоцна утре.
Помошта следува по вчерашниот телефонски разговор помеѓу министерката Радмила Шекеринска и нејзиниот словенечки колега Матеј Тонин.
„Се надевам дека ќе ги скротите огновите што е можно поскоро“,
ѝ напиша Тонин на Шекеринска, информирајќи ја за брзата реакција на сојузничката земја.
Министерката, пак, вчера се заблагодари за помошта од соседните држави и НАТО сојузниците и рече дека Северна Македонија може да смета на своите пријатели во неволја.
„Навистина ми е драго што колегата Тонин многу брзо реагираше позитивно и по првичните најави за помош кои што дојдоа од Србија и Бугарија, имаме ист одговор и од страна на Словенија. Тоа покажува голема солидарност од страна на нашите сојузници и од соседите“,
рече Шекеринска.