Во новоизградениот специјализиран Дневен центар во с. Оризаре 38 деца со интелектуална попреченост од Општина Липково ќе бидат подготвувани за соодветно вклопување во редовниот образовен систем, информира Министерството за труд и социјална политика. Подготовката ќе ја врши стручен тим составен од рехабилитатор и едукатор, логопед, психолог, социјален работник и физиотерапевт.
Целта на предвидената индивидуална, групна и окупациска терапија на децата со попреченост е од најрана возраст тие да се стекнат и да ги развиваат вештините за секојдневниот живот. Децата ќе ги учат навиките за исхрана, за хигиена и за одржување на сопственото здравје, но ќе одржуваат и воспитни, социјални, културни и рекреативни активности. Во Центарот ќе бидат организирани и советувања и работилници за поддршка на родителите на овие деца.
Министерката за труд и социјална политика, Јагода Шахпаска, на отворањето рече дека преку Дневниот центар и најмладите реално ќе ги почувствуваат социјалните реформи што ги презема Владата.
„Целта на социјалната реформа е да се приближат социјалните услуги до корисниците, до граѓаните. Да се зголеми опфатот на граѓаните кои влегуваат во системот на социјална заштита, да се подобри квалитетот на социјалните услуги, а со тоа да се подобри и нивниот живот. Дополнително да се намали невработеноста и да се подобри животниот стандард на сите граѓани“,
рече министерката Шахпаска.
Шахпаска на здружението „Имаго плус“ им ја предаде дозволата за вршење дејност од социјална заштита за услугата – нега на деца со попреченост.
Градоначалникот на Општина Липково, Еркан Арифи, рече дека локалната заедница е горда што ја преземаме одговорноста за грижата за децата со попреченост од општината.
„Тие и нивните родители отсега нема да мораат да патуваат до градовите за да ја добијат неопходната нега. Дополнително, ние најдобро ги познаваме специфичните проблеми со кои се соочуваат овие семејства, па верувам дека помошта што ќе ја добиваат во новиот Дневен центар во Оризаре ќе биде уште поквалитетна од таа што им беше достапна досега“,
рече Арифи.
Министерството информира дека во рамките на проектот за подобрување на социјалните услуги досега поддржани се 19 проекти во 24 општини. Најголем дел од овие проекти се наменети за помош и нега на стари лица во домот, а по еден се за помош на стари лица во дневен центар, за рехабилитација на деца со попреченост и проект за рехабилитација и реинтеграција на лица со попреченост во локалната средина. За давање на услугите обучени се 300 лица, а се очекува да бидат опфатени околу 900 корисници. Една од главните цели на социјалната реформа е услугите да им бидат полесно достапни и на корисниците од руралните и најоддалечени региони во државата.