По сериозните критики за начинот на кој се бори против корупцијата и криминалот кои во Извештајот за инвестициската клима во Северна Македонија ги нагласи американскиот Стејт департментот на САД, Владата во својата реакција објавена денеска навестува дека до засегнатите чинители ќе бидат адресирани сите констатирани забелешки.
„Владата е одлучна и сериозно посветена на решавање на наталожените и децениски проблеми, а справувањето со високата корупција и организиран криминал е на врвот на приоритетните национални реформи кои веќе испорачуваат резултати. Прочистувањето на правосудството, постојаното зголемување на транспарентноста на институциите, новата стратегија за конфискација на имот, дигитализацијата на институциите со која се отстранува човечкиот фактор при носењето одлуки и унапредувањето на системот за јавни набавки се неповратни процеси кои претставуваат препрека и закана за секој поранешен, актуелен и иден функционер кога е во прашање корупцијата“,
се вели во писмената реакција на Владата која стаса 24 часа по обелоденувањето на содржината на Извештајот.
Според нив, започнатите процеси веќе даваат видливи резултати а како аргумент ги наведуваат расчистените судски процеси низ кои повеќе високи политичари се осудени за сериозни кривични дела, а десетици се во напредни судски постапки и се очекува конечен исход од страна на судовите.
Од владата велат дека „правосудството ги има сите услови за професионално и непристрасно одлучување, ослободено е од какви било влијанија на извршната власт, а органите на прогонот несомнено постапуваат неселективно, без разлика за кој функционер станува збор“.
„Меѓународните и домашните извештаи со сите нотирани податоци, се дополнителен мотив за Владата да продолжи со континуираната и неселективна борба против корупцијата, за обезбедување систем во кој институциите се во служба исклучиво на граѓаните. Со сите преземени мерки и предвидени иницијативи, Владата на Северна Македонија упатува сериозна порака до сите носители на јавни функции, државни службеници и граѓани дека учеството во коруптивни активности не се исплати и сериозно ќе биде казнето“,
пишува во реакцијата од македонската влада.
Во Извештајот на Стејт департментот се укажува дека корупцијата е постојан проблем во земјава. Се констатира дека закони има, ама власта гони само критичарите и престапниците од ситен калибар.
„Северна Македонија има закони чија цел е борба против поткупот, злоупотребата на службената положба, конфликтот на интереси, а владините функционери и нивните блиски роднини се законски обврзани да ги објават нивните приходи и имот. Сепак, спроведувањето на антикорупциските закони на моменти е слабо, при што селективно се таргетираат критичари на власта и престапници од низок калибар. Има кредибилни обвинувања за корупција во полицијата/обвинителството, судството и многу други сектори“,
Извештајот на Стејт департментот денеска го коментираа и од ВМРО-ДПМНЕ. За нив тој е потврда дека Зоран Заев и неговата Влада ја зацементирале Македонија на дното.
„Нашите стратешки партнери нотираат злоупотреба на скратените постапки во Собранието. Тоа е работа против која ВМРО-ДПМНЕ континуирано се бори, но и постојано зборува. Законите не се прават врз основа на праксата и реалните потреби, и често се туркаат низ Собранието со скратени постапки, се вели во извештајот и се додава дека законите на хартија се во ред, но од друга страна не се имплементираат што претставува проблем и за граѓаните и за бизнис заедницата“,
истакна потпретседателот на партијата, Владо Мисајловски.