Премиерот Зоран Заев денеска ја пофали локалната власт во Охрид за справувањето со проблемот со дивоградбите.
Заев рече дека уривањето на дивоградбите во Охридскиот регион мора да се спроведува согласно законите и со запазување на предвидените постапки, посочувајќи дека процесот на отстранување на илегално изградените објекти на крајбрежјето на езерото ќе продолжи.
„Како претседател на Владата, можам да кажам само аферим за тоа што е досега направено.Не е лесно, некаде имате фалирање на судови како второстепени истанци затоа што се прават потези, не знам за исклучување на струјата, надвор од законот или било што и ќе ја врати постапката. Затоа мораме сите институции согласно своите надлежности да бидеме фокусирани. Локалната власт овде во Охрид си ја врши својата работа, централната власт си ја врши својата работа, а може судската да промаши во одредени делови. Но, бев на увид како се прочистени плажите и навистина кога го гледате тоа како слика, тогаш гледате како се враќа природата, како се враќа тоа што е културното и природно богатство на Охрид и Охридското Езеро, на крајбрежјето“,
рече Заев.
На прашањето зошто централната власт не ја преземе обврската за уривање на дивоградбите, наместо тоа да е надлежност на општините, премиерот рече дека тоа би било централизација на власта, што според него, е лоша порака за граѓаните.
„Слободата и демократијата живеат и се слават во нашата земја…Навистина ги следиме законите. Централната власт е во позадина, со поддршка не само во изјавите, туку и финансиски поддржуваме и се. Затоа што во моменти кога доаѓате на вакви предизвици повторно ја централизирате власта заради било кој изговор, тоа е лоша порака за граѓаните. Наша намера е да додецентрализираме, да пуштиме дополнително нови надлежности, па дури и тие што ги има кај градоначалникот и Советот да ги пуштиме на месните заедници, до таму, до граѓаните да стигнат. И од тој аспект сакаме согласно законите да се тераат сите постапки“,
рече Заев.