Поплавите не ги поштедија ниту починатите – водите носеа и надгробни споменици во Германија
Селските гробишта во Алтенар во западниот дел на Германија беа однесени од надојдените води. Дел од жителите немо го набљудуваа местото каде почиваат нивните роднини. Сведочат за тоа како природната стихија наеднаш го погодила селото.
„Видов како е однесена цела куќа со две лица внатре. Едно тело веќе пронајдоа“,
вели Антоанет Штајнхоф, жителка на Алтенар.
Најголемо е уништувањето покрај бреговите на реките . Улиците или она што е останато од нив се закопани под кал, автомобили се превртени покрај купишта остатоци. Тоа е глетката низ делови на Западна Европа по катастрофалните поплави во кои загинаа најмалку 160 лица, а стотици се водат за исчезнати.
Најмалку 133 жртви има во Германија каде најпогодени беа Северна Рајна-Вестфалија, Рајнската област-Пфалц и Сарскиот регион. Во Белгија, потврдена е смртта на 27 лица, но властите предупредуваат дека бројот може да се зголеми. Урсула фон дер Лајен, претседателката на Европската комисија, рече дека „срцето и потонало“ по посетата на белгиските градови.
Се интензивира потрага по преживеани и покрај зголемувањето на нивото на водите, свлечиштата, како и прекините на електрична енергија. Германската армија распореди 850 војници. Според Министерството за внатрешни работи,околу 22.000 пожарникари и хуманитарни работници учествуваат во операциите за спасување.