Судијката Добрила Кацарска минатата недела се обрати до Советот од кој побара да ги провери тврдењата на обвинителката Лиле Стефанова во сведочењето за „Рекет“
Судскиот совет ќе ја проверува евентуалната инволвираност на судијката Добрила Кацарска во предметот „Империја“, изјави денеска претседателот на Советот, Киро Здравев.
„На 31 јануари до судски совет е испратено барање од Добрила Кацарска за утврдување инволвираност во овој предмет. Ова е првпат судија да бара покренување постапка за утврдување одговорност и ќе постапуваме по тоа“,
изјави Здравев, одговарајќи на новинарско прашање на денешната презентација на анализата за работата на Судскиот совет.
Кацарска минатата недела побара од Советот да ги провери тврдењата на обвинителката Лиле Стефанова искажани на рочиште за случајот „Рекет“ дека судијката во време додека се одлучувало за притворот на Орце Камчев за предметот „Империја“, цело време била во судот и вршела притисок преку колега обвинител.