Министерот за здравство, Венко Филипче, соопшти дека во случајот со 50-тината деца во Гевгелија станува збор за обична вирусна инфекција и нема никаква врска со ковид-19.
Како што рече министерот, не се само деца од тој регион, зголемен број на случаи има и во детската болница во Козле и во прашање е тоа што децата подолг период беа изолирани и сега доаѓаат во контакт со предизвикувачи, па реагира имунолошкиот систем.
„Станува збор за вирусна инфекција. Тоа што сакавме да потврдиме односно да исклучиме е дали има некаква врска со ковид затоа кај сите деца се направи серолошка анализа на крвта за да се види дали евентуално имаат антитела односно дали во изминатава година го поминале ковидот асимптоматски. И тоа не е случај. Ниту едно дете нема антитела за прележан ковид. И вториот момент, зошто сега во толкава бројка во еден регион, но има информации од вчера дека има зголемена бројка на деца и во болницата во Козле, очигледно дека имуниот систем сега на некој начин проработува поради тоа што подолго време биле изолирани дома и сега децата доаѓаат во контакт со предизвикувачи и на тој начин реагира имуниот систем. Значи нема никаков простор за паника, битно е дека нема никаква врска со ковидот директно, така да е обична вирусна инфекција“,
рече Филипче.